Astana bazaryndaǵy buzaqylyqqa baılanysty 18 adam tutqyndaldy

ASTANA. 17 maýsym. Astananyń polısııa qyzmetkerleri «Astanalyq» bazary mańyndaǵy buzaqylyqqa qatystylyǵyn tekserý maqsatynda 18 adamdy ustady. Atalǵan bazar halyq arasynda «Artem» saýda úıi degen atpen belgili. Bul týraly qalalyq ishki ister departamentiniń baspasóz qyzmeti habarlady. Keshe, saǵat 20:10 shamasynda departamenttiń jedel basqarý ortalyǵyna saýda úıiniń qaýipsizdik qyzmetkerleri qaıyrshy áıeldi ustaǵany týraly habar kelip túsken. Tártip saqshylary 30 jastaǵy áıeldiń II toptaǵy múgedek jáne mektep jasyna deıingi úsh balasymen qaıyr suraý maqsatymen Almatydan Astanaǵa arnaıy kelgenin anyqtady. Ol buǵan deıin de osyndaı quqyq buzýshylyǵy úshin ákimshilik jaýapkershilikke tartylǵan. Aıta keteıik, keshe keshkisin qaıyr suraǵan azamatsha B. men saýda úıiniń qaýipsizdik qyzmetkerleri sózge kelip, sońy janjalǵa ulasady. Olardyń janyna sol jerdegi adamdar jınalyp, kóbeıe túsken. Osy oqıǵaǵa baılanysty 18 adam qolǵa tústi. Olardyń arasynda mas adamdardyń da bar ekeni belgili bolyp otyr. Zardap shekkender men múlikke zaqym kelý derekteri anyqtalǵan joq. Búginde bul fakt sotqa deıingi tergeýdiń biryńǵaı tizilimine tirkeldi. Azamatsha B.-nyń aryzymen Qazaqstan Respýblıkasy Qylmystyq kodeksiniń 252-baby boıynsha (jeke kúzet qyzmetteri qyzmetshileriniń óz ókilettikterin asyra paıdalanýy) sotqa deıingi óndiris bastaldy. Sondaı-aq, saýda úıi qaýipsizdik qyzmetkerleriniń aryzymen Qylmystyq kodekstiń 293-baby boıynsha (buzaqylyq) materıal tirkeldi. Qazir osy iske qatysty tergeý amaldary júrgizilýde. Elaman Qońyr. Derek: Astana qalalyq ishki ister departamentiniń baspasóz qyzmeti. Sýret: today.kz.