Sýretti túsirgen – Aqádil Rysmahan
Tarazda D.Mendeleev atyndaǵy Reseı hımııa-tehnologııa ýnıversıtetiniń fılıalyn ashýdyń mańyzy zor. О́ıtkeni óńirdegi eń iri óndiris oshaǵy sanalatyn «Qazfosfat» JShS-da 8 myńǵa jýyq maman eńbek etedi. Hımııa ónerkásibiniń lokomotıvine aınalǵan seriktestik jyl saıyn jańa mamandarmen tolyǵyp otyrady. Bul óz kezeginde salada jańa býynnyń qalyptasýyna septigin tıgizedi.
Bir jyldan astam ýaqyt buryn bastalǵan baıandy bastama máresine jetken sekildi. M.H.Dýlatı atyndaǵy Taraz óńirlik ýnıversıtetiniń bazasynda D.Mendeleev atyndaǵy Reseı hımııa-tehnologııa ýnıversıteti fılıalynyń saltanatty ashylý rásimi uıymdastyryldy.
Is-sharaǵa óńir basshysy Erbol Qarashókeev, Ǵylym jáne joǵary bilim vıse-mınısti Talǵat Eshenqulov, «Qazfosfat» JShS bas dırektory Evgenıı Pak, D.Mendeleev atyndaǵy RHTÝ rektorynyń mindetin atqarýshy Evgenıı Rýmıansev arnaıy qatysty.
«Memleket basshysy bilim salasyna qarasty kózqarasty ózgertý qajet ekenin, ásirese tehnıkalyq mamandyqtarǵa basymdyq berý kerektigin shegelep tapsyrǵany barshamyzǵa málim. Sol úshin de óńirde osyndaı ıgi bastama qolǵa alynyp jatyr. Bizge ınjener men ónerkásip salasy mamandarynyń jańa býynyn qalyptastyrý kerek. Bul rasynda da kezek kúttirmeıtin jumys.
Jambyl óńiri – hımııa ónerkásibiniń Otany. О́ndirisi órkendegen óńirdegi iri zaýyttar salanyń aınasyna aınalǵany anyq. Oblys ortalyǵy Taraz qalasynda irgeli joǵary oqý orny fılıalynyń ashylýy – hımııa ındýstrııasyn odan ári damytýdaǵy mańyzdy qadamnyń biri. Sondyqtan da bastama baıandy bolsyn deımin. Bul jerden myqty mamandar shyǵady degen senim zor», dedi óńir basshysy Erbol Qarashókeev.
Prezıdent tapsyrmasyn júzege asyrý maqsatynda ilgeride M.H.Dýlatı atyndaǵy Taraz óńirlik ýnıversıteti, «Qazfosfat» JShS jáne D.Mendeleev atyndaǵy Reseı hımııa tehnologııa ýnıversıtetiniń ujymy úshjaqty kelisimge qol qoıyp, TMD elderi arasynda alǵash ret hımııa ónerkásibi salasyndaǵy jelilik kampýstyń tusaýkeserin uıymdastyrdy. Keıinnen «Mendeleev synyby» jobasyn iske asyrdy. Bir sózben aıtqanda, fılıaldyń ashylýyna deıin M.H.Dýlatı atyndaǵy Taraz óńirlik ýnıversıtetiniń basshylary az jumys atqarǵan joq.
Is-shara barysynda sóz alǵan vıse-mınıstr Talǵat Eshenqulov Ǵylym jáne joǵary bilim mınıstri Saıasat Nurbektiń quttyqtaýyn jetkizdi. Al «Qazfosfat» JShS bas dırektory Evgenıı Pak bul jobanyń irgeli kásiporyn úshin de mańyzy zor ekenin atap ótti.
Derekke sensek, jańa oqý jylynan bastap resmı túrde iske kirisken RHTÝ fılıalynda alǵashqy top qurylǵan. Bul topta óńirdiń 30 stýdenti «Beıorganıkalyq zattardyń hımııalyq tehnologııasy» mamandyǵy boıynsha bilikti mamandardan dáris alyp júr.
Fılıal ǵımaratynda 4 zerthana, 2 kompıýterlik synyp, májilis zaly jáne arnaıy aýdıtorııa bar. Bilim berý nysanynyń kúrdeli jóndeý jumystaryna jáne arnaıy jabdyqtardy jetkizýge «Qazfosfat» JShS qarajat qarastyrǵan.
Joǵaryda aıtqanymyzdaı, ótken jyldyń mamyr aıynda júzege asyrylǵan jelilik kampýs jobasynyń negizinde «2+1+1» bilim berý baǵdarlamasy iske qosylǵan bolatyn. Nátıjesinde, bolashaq hımık-tehnologter alǵashqy eki kýrsty M.H.Dýlatı atyndaǵy Taraz óńirlik ýnıversıtetinde oqysa, úshinshi kýrstan bastap RHTÝ-de bilim alady. Al tórtinshi kýrsty Tarazda jalǵastyryp, «Qazfosfat» JShS-da tájirıbesin tolystyrady. Sondaı-aq óńirdegi mektepterde jaratylystaný ǵylymı sıkl pánderin tereńdetip oqytý júıesin qalyptastyrý úshin «Mendeleev synyby» jobasy jalǵasady.
Jambyl oblysy
