nege.kz
Uıymnyń saıtynda «izdeýdegi avtorlar tizimi» jarııalanǵan bolatyn. Tizimde Álı Oqapov, Dımash Qudaıbergen, Darhan Djýz, Imanbek, Qaırat Nurtas, Raim & Artur, RinGo, Sadraddin, Say Mo, Son Pascal, M'Dee, V $ X V PRiNCE, Ǵalymjan Moldanazar sııaqty tanymal ánshiler bar.
Uıym jalpy sany 421 oryndaýshyǵa «izdeý» jarııalaǵan. Belgili bolǵandaı, tizimde paıdalanylǵan týyndylary úshin aqy tólenýge tıis óner adamdary kórsetilgen. Endi olar osy tizimnen ózderin taýyp, QazAQ-qa habarlasýy kerek.
- Biz barlyq jerde olardy izdeýge mindettimiz, qońyraý shalamyz. Bul adamdar saıtta ilinip tur. Nelikten ol adamnyń ózi qalamaqysynyń qaıda ekenin izdemeıdi? Kelińizder, biz barlyq avtorlardyń qalamaqysyn tóleýge daıynbyz. Keıbir avtorlyq quqyq ıeleri «Men aqsha almaımyn, eshqashan alǵan emespin» deıdi. Sizdiń rekvızıtterińizdiń qandaı ekenin biz qaıdan bilemiz? – deıdi QazAQ uıymy bas dırektorynyń orynbasary Ánýar Ersultan.
Osy oraıda ol Qazaqstandaǵy ónerde, mýzykada, vırtýaldy salada ónermen aınalysatyn búkil jas býynnyń dırektorlary, menedjerleri bar ekenin eske saldy. Aıtýynsha, solar jumys isteýi kerek. Avtorlyq jáne sabaqtas quqyqtardyń ne ekenin, avtorlyq syıaqy qaı jerde ekenin bilýleri qajet.
- Olar bizge kez kelgen ýaqytta habarlasa alady. Biz ashyq uıym retinde aqshany tóleımiz. 5, 10 jyldyń barlyq aqshasy qazaqstandyq avtorlar qoǵamynda jatyr, – dedi Ánýar Ersultan.
Ádilet mınıstrliginiń saıtynda QazAQ uıymynyń avtorlar týyndysynyń tek kópshilik aldynda oryndalǵany nemese kabel arqyly jáne efırde jarııalanǵany úshin syıaqy alý quqyǵyn iske asyrý boıynsha akkredıttelgeni kórsetilgen.
Jýrnalıster uıym ókilderinen tıisti akkredıtasııasyz, Meta-men kelissózder júrgizip, avtorlardyń týyndylaryn sandyq segmentte paıdalaný úshin qarajat jınaı alatyny ras pa dep surady. Al uıym ókilderi avtorlyq quqyqty qorǵaýǵa qajetti qujattar men ókilettikterdiń barlyǵyna ıe ekenderin málimdedi.
- Bizde sandyq segmentte, avtorlyq quqyqty qorǵaý boıynsha kez kelgen segmentte akkredıtasııa bar, - dedi Qazaqstan avtorlar qoǵamynyń bas dırektory Aınur Esendikova.
Eske sala ketsek, buǵan deıin Instagram jelisinen qazaqstandyq ártisterdiń ánderi joǵalyp ketken edi. Oǵan Qazaqstan avtorlar qoǵamynyń talaptary sebep bolǵany anyqtaldy.
Uıym Meta kompanııasynan avtorlyq quqyqty paıdalanǵany úshin nemese ony paıdalaný quqyǵyn berý úshin tólenetin aqyny arttyrýdy suraǵan. Qazaqstandyq avtorlar qoǵamy tólemderdiń jetkilikti túrde túspeıtinin aıtyp, shaǵymdanyp otyr.
Bul shekteýler qazaqstandyq ártisterdiń narazylyǵyn týdyryp, áleýmettik jelilerde qyzý pikirtalas boldy. Ánshiler men kompozıtorlar Qazaqstan avtorlar qoǵamynyń qarjylyq esep berýi men avtorlarǵa tólem júrgizý mehanızmderine kúmán keltirdi.
