Foto: gov.kz
Bıyl úrkerlik 1 000 turǵyn úı tabıǵı gazǵa qosylý múmkindigine ıe boldy.
«Úrkerdegi alǵashqy abonentterdiń gazǵa qosylýy, shyn máninde, tarıhı sát. 2025-2026 jyldary gazǵa osy jerdegi barlyq jeke úı men turǵyn úı kesheni qol jetkize alady. Gazdandyrý úılerdiń qaýipsizdigin qamtamasyz etedi, ol ekologııalyq taza jáne adamdar úshin qoljetimdi», dedi Astana qalasy Nura aýdany ákiminiń orynbasary Sársenǵalı Aqjolov.
Úrkerdi tolyq gazdandyrý úshin barlyǵy 173 shaqyrym gaz jelisin salý josparlanǵan. Qazirgi ýaqytta josparlanǵan jumystardyń shamamen úshten biri aıaqtalǵan.
Turǵyn alapqa tabıǵı gaz Astana ákimdigi, Energetıka mınıstrligi, «Qazaq Gaz Aimaq» AQ men «Qazaq Zhylu» JShS-niń úılesimdi jumysynyń nátıjesinde qol jetkizilgen.
Aıta keteıik, buǵan deıin elorda ákimdigi gazdandyrýdyń eki kezeginiń qurylysyn aıaqtady. Osy qurylys aıasynda Kóktal-1, Kóktal-2, Agroqalashyq jáne Potanın kóshesi aýdanyndaǵy qalanyń eski bóliginiń turǵyndary tabıǵı gazǵa qosylǵan.
Almaty aýdanynda Temirjolshylar vokzaly, Promyshlennyı, Ońtústik-Shyǵys oń jáne sol jaǵy, Kúıgenjar, Mıchýrıno, sondaı-aq «Aqbıdaı», «Qazaqaýyl» shaǵyn aýdandarynyń turǵyndary tabıǵı gazǵa qol jetkizse, Esil aýdanyndaǵy Vella vıldj, Kýrshavel, Family Town, Family Park turǵyn úı keshenderi jáne Nura aýdanyndaǵy Býdapesht, Kosmık-Sıtı turǵyn úı keshenine gaz berilgen.
Astana qalasy ákimdiginiń habarlaýynsha, «Turan», «Telman», «Ońtústik-Shyǵys» gaz jylý stansalaryna jáne «Úrker», «Prıgorodnyı», «Family village», «О́ndiris», «Kırpıchnyı» eldi mekenderin gazben qamtý jelileriniń qurylysy aıaqtalǵan.
