Shoqy, qyrattyń qoıyn-qonyshynda tolyqsyǵan qaraǵan-tobylǵyny aralasańyz, aldyńyzdan appaq qar oranǵan tiken butalardyń arasynan qyp-qyzyl ıtmuryn jasaýrap kórinedi. Tipti keıde aspany ashyq sáskede anadaıdan kún nuryna shaǵylysyp alystan qyzaraqtap, menmundalaıdy. Ańǵaryp kóre bilgenge, árıne. Qarashada bir boran soqqan soń Arqanyń tiken butasyn ımıtip, albyrap turǵan ıtmuryndy kórgen de, kórmegen de armanda. Bul kúnderi olardyń jıdegin qarǵa, saýysqandar qorek qylyp júrgen shyǵar.
Siz oılańyzshy, týra osy kúnderi qala men dala qaltyrap turǵanda Arqada júrekteı qyzyl ıtmuryn sýyq pen qardan semip qalmaı, tabıǵatyn, bálkim mahabbatyn áıgilep turǵandaı. Onyń tula boıynan sonaý qar astynda qalǵan kóktem men jazdyń ısi ańqıdy. Batyr týǵan qazaqtyń júreginiń túgi bar deýshi edi ǵoı. Bul jıdeler de solaı. Júrekteı qyp-qyzyl, túbi túktenip ketedi. Júrektiń sýretin kór de, ıtmuryndy kór. Qazaq júreginiń túgi bar dep, sirá, ıtmurynǵa qarap aıtsa kerek degen oı týady. Osy ıtmuryndy bir qar jaýǵan soń sonaý jyldary atam terip ákelip, ystyq sýǵa salyp, shyrynyn iship júretin. Búginde ómir boıy dalada mal baqqan ákemiz mol qylyp terip qoıyp, qystaı sýsynyn basady. Jaryqtyq, aqsyratpaıdy deıdi. Qystykúni daladan ákep, ystyq sý quıyp jibergende, hosh ıisi ańqyp, úıdi alyp ketetin. Osylaısha, qyr qazaǵy qar tússe de úıinde kóktem «jamylyp», jaz «shyǵaryp» otyraryn, bálkim basqa nárselerdi qozǵap ketsem, oǵan da ıtmuryn kináli.
