Foto: Aqorda
«Barsha adamzat, ásirese shalǵaıda tirshilik etip jatqan turǵyndar men halyqtardyń osal toby sanıtarlyq talaptarǵa saı keletin taza aýyzsýǵa qol jetkizýge tıis. Bul – olardyń quqy. Klımat pen sý ınfraqurylymyna arnalǵan maqsatty ınvestısııalar sý kózimen qamtamasyz etip, ornyqty ósimge septigin tıgizedi. Osy arqyly tutas óńirler órkendeıdi. Qazaqstannyń taza aýyzsýǵa jappaı qol jetkizýdi kózdeıtin Freshwater Challenge jahandyq bastamasyna qosylýy elimizdiń osy maqsatqa jetýge beıil ekenin rastaıdy», dedi Prezıdent.
Memleket basshysynyń pikirinshe, sý kózderin ónerkásiptik, hımııalyq, aýylsharýashylyq jáne turmystyq lastanýdan qorǵaý isinde tehnologııalyq ınnovasııalar men retteý tetikterin qoldaný qajet. Sýdan tarshylyq kórmeýdiń mańyzdy aspektileriniń biri – sý qoımalarynyń áleýetin arttyrý, muzdyqtardy saqtaý, sýarýdyń ınnovasııalyq júıesin engizý.
Qasym-Jomart Toqaev muzdyqtardy qorǵaý men zertteýge arnalǵan jahandyq ortalyqtardy biriktiretin seriktestik qurýdy usyndy.
«Muzdyqtar sý almasý sıklinde aıryqsha ról atqarady. Olar dúnıe júzindegi 2 mıllıardqa jýyq adamdy sýmen qamtamasyz etetin ózen-kólderdi qorektendiredi. Sondyqtan muzdyqtardyń erýine jol bermeı, tirshilik nárine muqtaj óńirlerdegi sý resýrstaryn basqarý strategııasyn qoldaý úshin birlesken zertteý jumystaryn júrgizip, biryńǵaı sý saıasatyn ázirlegen jón», dedi Memleket basshysy.
Qasym-Jomart Toqaev sýǵa baılanysty týyndaıtyn tabıǵat apattarynyń aldyn alý sý qaýipsizdiginiń mańyzdy bóligi sanalatynyna nazar aýdardy. Jyl saıyn sý tasqyny men qýańshylyqtan álemde 1,5 mıllıardtan astam adam zardap shegedi. Ásirese, bul shaǵyn araldar men jaǵalaýda turatyn halyqtyń álsiz toptaryna qatty áser etedi. Prezıdent azamattardy qorǵaý jáne qaýip-qaterdi azaıtý maqsatynda erte saqtandyrý júıesin jetildirý óte ózekti dep sanaıdy.
