Qaraǵandydaǵy kremnıı zaýytyna 258 mln. teńge aıyppul salyndy

QARAǴANDY. 17 maýsym. Tabıǵatty qorǵaý prokýratýrasy Qaraǵandydaǵy metallýrgııalyq kremnıı shyǵaratyn zaýytty shómishten qysty. Oblystyq ekologııa departamenti qyzmetkerleriniń tekserýi barysynda atalǵan kásiporynnyń tabıǵatty lastaǵany anyqtalyp, sot sheshimimen oǵan 258 mıllıon teńge aıyppul salyndy. Bul týraly Qaraǵandy oblystyq ekologııa departamenti habarlady. Zaýytta 2011 jáne 2012 jyldary eki birdeı ken termııalyq pesh jumys istegen. Bul peshterdiń murjasyna ornatylǵan tazartý qondyrǵylary bolǵanymen, ara-tura ýly gaz aýaǵa jaıylyp turypty. Naqtyraq aıtar bolsaq, 2011 jyly atalǵan qondyrǵy isten shyǵyp, 29,5 saǵattaı, al 2012 jyly 253 saǵat shamasynda óship turǵan. Sonyń kesirinen ýly gaz aýaǵa emin-erkin jaıylǵan. Mamandar qorshaǵan ortaǵa keltirilgen zalaldy shotqa qaǵyp, tabıǵat 258,8 mıllıon teńge shamasynda zııan shekti degen qorytyndyǵa keldi. Maýsym aıynyń 9-ynda bolǵan ekonomıkalyq sot kremnıı zaýytyna 258,8 mıllıon teńge aıyppul kesip, kásiporynnan 7,7 mıllıon teńge kóleminde memlekettik baj salyǵyn alý jóninde sheshim shyǵardy. Qaırat Ábildınov. Derek: Qaraǵandy oblystyq ekologııa departamenti. Sýret: egemen.kz.