50 kg salmaqtaǵy Alýa – osy jarystyń basty favorıtteriniń biri. 28 jastaǵy boksshy osyǵan deıin álem chempıonatynda bir kúmis, bir qola medaldi oljalap, qurlyqtyń eki dúrkin chempıony atandy. Bul joly dúnıejúzilik dodada eki ret úzdik úshtikti túıindep, Azııa oıyndarynyń fınalynda óner kórsetken taılandtyq Chýthamat Raksatpen qolǵap túıistirýge tıis edi. Alaıda syn saǵatta A.Balqybekovanyń densaýlyǵy syr berip, dárigerler oǵan rıngke kóterilýge ruqsat bermedi. Elimizdiń boks federasııasy taratqan málimetke sensek, Alýa «ortasha dárejedegi ishek sındromy» dertine shaldyqqan. Al 57 kg salmaqtaǵy jastar arasyndaǵy álem birinshiliginiń jeńimpazy Uljan Sársenbek ýkraınalyq Karına Vovktan basym túsip, shırek fınalǵa shyqty.
Keshe álem chempıony Mahmud Sabyrhan (54 kg) taıpeılik Iаn Lın Laımen (Taıpeı) judyryqtasty. Mılana Safronovanyń (67 kg) da joly dál sol eldiń ókili Mın Lımen qıysty. Aıda Ábikeeva (63 kg) ózbekstandyq Dılfýza Bekovamen aıqasty. Búgin taǵy tórt jerlesimiz jekpe-jekke shyǵady. Atap aıtsaq, Áıgerim Sáttibaeva (48 kg) fılıppındik Magno Ofelııamen, Symbat Álıasqar (54 kg) qytaılyq Venkıan Hýmen, Dıas Moljigitov (75 kg) japonııalyq Daıgo Sýnagamen, Abylaıhan Júsipov (71 kg) túrikmenstandyq Baıramdurdy Nurmuhammedovpen kúsh synasady.
