Elbasy Katardyń syrtqy ister mınıstri Haled ál-Atyıany qabyldady

ASTANA. 17 maýsym. Elbasy Katar Memleketiniń syrtqy ister mınıstri Haled ál-Atyıany qabyldady. Bul týraly akorda.kz habarlady. Kezdesý barysynda saýda-ekonomıka, ınvestısııa jáne kólik-tranzıt salalaryndaǵy yntymaqtastyq máseleleri talqylandy. Nursultan Nazarbaev Qazaqstan men Katardyń qarym-qatynasy joǵary deńgeıde ekenin atap ótti. «Sizdiń saparyńyz yntymaqtastyǵymyzdyń deńgeıin odan ári kóterýge septigin tıgizetinine senimdimin. Katar bizdiń elordamyzdyń qurylysyna, sonyń ishinde «Nur Astana» meshitiniń qurylysyna járdem etti. Sonymen qatar, Semeı polıgonyndaǵy ıadrolyq synaqtardan zardap shekken jandar úshin Semeı qalasynda salý josparlanǵan saýyqtyrý ortalyǵynyń qurylysyna jasalǵan kómekke rızashylyq bildirgim keledi», – dedi Memleket basshysy. Bul joba Nursultan Nazarbaevtyń mádenıet, bilim jáne áleýmettik baǵdarlamalar qory men Katar damý qorynyń ózara yqpaldastyǵy negizinde júzege asyrylýda. Haled ál-Atyıa óz kezeginde Katar ámiriniń sálemin jetkizip, ekijaqty yntymaqtastyq odan ári nyǵaıa beredi dep úmittenetinin bildirdi. Elaman Qońyr. Derek, sýret: akorda.kz.