«KEGOC» AQ men EQDB arasyndaǵy kezdesýde 141 mlrd teńgege deıingi somaǵa nesıelik kelisimge qol qoıyldy. Onyń ishinde Qazaqstannyń Damý bankimen 32 mlrd teńge somasyna kelisim bar.
«Qarajat uzyndyǵy shamamen 600 shaqyrym 500 kV elektr jelisi ınfraqurylymyn salýǵa jumsalady. «Atyraý – Aqtóbe» tasjolynyń boıynda «Qarabatan – О́lke» jelisi, 500 kV Qarabatan qosalqy stansasy salynady. Sondaı-aq Qarabatan (220 kV), О́lke (500 kV) qosalqy stansalaryndaǵy taratý qurylǵylaryn keńeıtýge jumsalady. Bul Batys Qazaqstannyń energetıka júıesin eldiń Biryńǵaı elektr energetıkasy júıesine qosýǵa múmkindik beredi. Batys aımaqtyń ótkizý qabileti 500 MVt-ǵa deıin artady», dedi qujatqa qol qoıý rásiminde «Samuryq-Qazyna» basshysy Nurlan Jaqypov.
Sarapshylardyń pikirinshe, jobany júzege asyrý nátıjesinde:
– elektrmen jabdyqtaýdyń senimdiligi kúsheıedi;
– elektr energııasy men qýat teńgerimsizdigin óteýge manevrlik generasııa paıdalanylady;
– batys aımaqtardyń energetıka qaýipsizdigi artady.
«Damý jónindegi qarjy ınstıtýttarymen kelisimderge qol qoıý qordyń satyp alý rásimderiniń ashyq ekenin taǵy bir márte dáleldedi. Bul olardy «KEGOC» AQ jobasynda qoldanýǵa múmkindik berdi», dedi Nurlan Jaqypov.
Qazanda Prezıdent Qasym-Jomart Toqaev EQDB prezıdenti Odıl Reno-Bassomen kezdesý ótkizgeni belgili. Qarjy uıymynyń basshysy «Samuryq-Qazyna» AQ satyp alý rásimderine oń baǵasyn berdi. Onyń aıtýynsha, nesıe berýshi kompanııalar satyp alý rásimderin qordyń erejelerine sáıkes júzege asyrady. Al bul «Samuryq-Qazyna» tobynyń satyp alý rásimderine, olardyń ashyqtyǵyna degen senimdi bildiredi.
Eýropa qaıta qurý jáne damý banki qordyń portfeldik kompanııalarynyń energetıka, taý-ken, munaı-gaz, kólik salasyndaǵy jobalaryna qatysady.
EQDB ári qaraı da «Samuryq-Qazyna» AQ kompanııalary tobymen strategııalyq ınvestısııalyq jobalardy júzege asyrý jónindegi tyǵyz seriktestikti jalǵastyrmaq.
