Foto: Sputnik/Ertaı Sarbasov
Kókshetaýda Jańa jyl qarsańynda merekelik sharalar ótetin negizgi oryndar anyqtalǵan.
Kókshetaý qalasy ákimdiginiń habarlaýynsha, merekeniń basty orny Abylaı han alańyndaǵy muz qalashyǵy bolmaq. Munda ádettegideı bıiktigi 22 metr bolatyn bas shyrsha ornatylady.
Sonymen qatar, qala turǵyndaryna úlken metall syrǵanaq jáne kem degende 12 muz kompozısııasy ýáde etilgen, al alańda orta jáne eki shaǵyn muz syrǵanaqtary ornalasady. Sondaı - aq, «Jańa jyldyq fotoaımaq 2025» jáne «Jańa jyldyq shana», merekelik bezendirilgen sahna jáne ulttyq stıldegi 8 shaǵyn arhıtektýralyq nysan – Bilezik jáne Saqına sııaqty sýretke túsirýge arnalǵan oryndar qarastyrylmaq.
«Qosymsha eki oryn «Dostar» jáne «Bolashaq saraıy» mádenıet saraıynyń janyndaǵy alańdarda ornalasady. Munda shyrshalar jeńil elementtermen bezendirilip, sýyq neonnan jasalǵan dombyra túrindegi MAF jáne qos-jaryq gırlıandtar ornatylady. Sondaı-aq bul ýchaskelerde muz syrǵanaqtary ornatylady», delingen habarlamada.
Jalpy, bıylǵy jyly jańa jyldyq is-sharalarǵa daıyndyq jumystaryna qala bıýdjetinen QQS qosqanda 51 mıllıon teńge nemese QQS-syz 45,5 mıllıon teńge bólingen.
«Bas shyrshany jaǵyp, muz qalashyǵyn saltanatty túrde ashý josparlanǵan. Bul is - sharanyń kúni men ýaqyty keıinirek naqtylanatyn bolady, dep tolyqtyrdy vedomstvodan.
