Qos nysan bir kúnde ashylyp, aýyl turǵyndary máre-sáre boldy. Eskeldi bı aýlynda 3200 adam turady. Eldi mekende 30 jyldan astam ýaqyt boıy mundaı nysandar bolmaǵan. Bir-birine jaqyn ornalasqan jańa Mádenıet úıi men DSO zamanaýı talaptarǵa saı, mádenı, sporttyq is-sharalardy uıymdastyrýǵa, bos ýaqytty tıimdi ótkizýge qajetti jaǵdaılar jasalǵan. Qos nysannyń qurylysy osy jyldyń mamyr aıynyń sońynda bastalǵan edi.
«Men osy aýylda týyp-óstim. Aýlymyzdaǵy qazirgi oń ózgeristerdi kórgende qýanamyz. Buryn jas sportshy balalarymyz 7 shaqyrym jerdegi Úshtóbege baryp jattyǵýǵa májbúr bolatyn, budan bylaı eshqaıda barmaı-aq osy aýylda jattyǵady. Sol sııaqty jańa mádenıet úıimiz de bar. Bizde 90-jyldardan beri mádenıet úıi de, sport kesheni de bolǵan joq. Endi sportpen de, shyǵarmashylyqpen de aınalysýǵa bolatyn sáýletti, zamanaýı ǵımarattarymyz kózqýanyshymyzǵa aınaldy», deıdi jergilikti turǵyn Elızaveta Shın.
Jalpy aýdany 800 sharshy metr bolatyn eki qabatty dene shynyqtyrý-saýyqtyrý kesheni ǵımaratynda oıyn zaldary, boks, kúres, jattyǵýǵa arnalǵan zal bar. Kúres, voleıbol, basketbol, shahmat, toǵyzqumalaq seksııalary jumys isteıdi. Al jańa mádenıet úıi 150 orynǵa laıyqtalǵan. Onda akt zaly, oqý zaly bar kitaphana ornalasqan. Vokal, dombyra, qobyz, bı úıirmelerin ashý josparlanyp otyr. Eki jańa nysannyń iske qosylýynyń arqasynda aýylda 30 turaqty jumys orny ashyldy.
«Aýyldy damytýǵa asa qajetti nysandardyń salynǵanyna qýanyshtymyz. Bul eń aldymen, jastarǵa, sosyn bizge, ıaǵnı aǵa býynǵa da qajet. Osyndaı ıgi jańalyqtar kóp bolsyn», deıdi qýanyshyn bólisken aýyl aqsaqaly Tóleýhan Súttibaev.
Bıyl óńirde jańa birneshe áleýmettik nysan iske qosyldy. Aıtalyq, Eskeldi aýdanynda 4 mektep pen balabaqshaǵa jóndeý júrgizildi, sondaı-aq densaýlyq saqtaý, mádenıet, sport salalaryndaǵy 12 jańa nysandy iske qosý josparlanyp otyr. Onyń beseýi paıdalanýǵa berildi, qalǵan altaýyn jeltoqsan aıynyń sońyna deıin iske qosý kózdelgen.
«Halyqtyń ótinishin eskere kele, Eshkiólmes, Jańalyq aýyldarynda 180, 120 oryndyq eki jańa mektep qurylysynyń jobalyq-smetalyq qujattary daıyndalyp jatyr. Memlekettik saraptama qorytyndysy jyl sońyna deıin shyǵady. Al Qarabulaq aýlyndaǵy orta mektep pen Eltaı aýlyndaǵy S.Seıfýllın atyndaǵy mektepke kúrdeli jóndeý jumysynyń jobalyq-smetalyq qujattamasy daıyn, memlekettik saraptamanyń qorytyndysy alyndy. Bıýdjetti naqtylaý kezinde bul eki jobaǵa da tıisti qarajat qarastyrylady. Sonymen qatar aýdandaǵy bilim berý mekemelerin gazdandyrý jumystary júrgizilip jatyr. Qarabulaq aýlyndaǵy Shestakov atyndaǵy mektep bıýdjet qarajaty esebinen, al Syrymbet aýlyndaǵy Jaqypbaev atyndaǵy mektep demeýshi kómegimen gazǵa qosyldy», dedi oblys ákimi Beıbit Isabaev.
Aıta ketelik, osy jyly M.Mámetova atyndaǵy, Qońyr aýlyndaǵy orta mektepter men M.Baısov aýlyndaǵy balabaqsha kúrdeli jóndeýden ótken. Odan bólek, Aldabergenov aýlyndaǵy balabaqshaǵa aǵymdaǵy jóndeý júrgizilgen. Qabylısa jyraý atyndaǵy, Qaınarly aýyldaryndaǵy orta mektepterge avtobýs pen «Gazel» avtokóligi satyp alynǵan. Aýdandaǵy 11 mekteptiń kitaphanasy jańartylǵan.
Densaýlyq saqtaý máselesine kelsek, salanyń ınfraqurylymyn jaqsartý maqsatynda bıyl Ekpindi, Jańalyq aýyldarynda 2 blokty-modýldi medısınalyq pýnkt ornatyldy. Medpýnkt Táýelsizdik kúni qarsańynda Aqeshki aýlynda da iske qosylady. Sol sııaqty «Aýyldaǵy densaýlyq saqtaýdy jańǵyrtý» ulttyq jobasy aıasynda aýdanda 5 nysan salynady. Sonyń ishinde Shymyrdaǵy dárigerlik ambýlatorııa men M.Baısov aýlyndaǵy feldsherlik-akýsherlik pýnkttiń qurylysy osy aıda aıaqtalsa, osyndaı nysandar Jastar, Qaınarly, Jalǵyzaǵash aýyldarynda kelesi jyly iske qosylady. Sonyń nátıjesinde densaýlyq saqtaý salasynyń ınfraqurylymy aýdannyń 8 aýlynda jaqsarady.
Mádenıet salasy da nazardan tys qalmaıdy. «Aýyl – el besigi» jobasy aıasynda Qaratal aýlynda júz orynǵa arnalǵan Mádenıet úıiniń qurylysy aıaqtalyp, Qońyr, Jalǵyzaǵash aýyldarynda blokty-modýldi klýb qoldanysqa berilgen. Taǵy bir klýb Aqyn Sara aýylynda kelesi aptada iske qosylady. Sport salasynda Eltaı, Shymyr, Jetisý aýyldarynda 3 blokty-modýldy sporttyq kesheniniń qurylysy júrgizilip jatyr.
Jalpy, 2022-2024 jyldary aýdanǵa ınfraqurylymdyq, áleýmettik nysandardy salýǵa, qaıta jańǵyrtýǵa, jobalaý jumystaryna oblystyq bıýdjetten 25,9 mlrd teńge bólingen.
Jetisý oblysy,
Qaratal aýdany
