Qazaqstanda sońǵy 5 jylda ortasha ómir súrý jasy 3 jylǵa artty

ASTANA. 17 maýsym. Memlekettik hatshy Gúlshara Ábdiqalyqova densaýlyq saqtaý júıesi qyzmetkerlerimen kezdesti. Bul týraly akorda.kz habarlady. Kezdesýge densaýlyq saqtaý jáne áleýmettik damý birinshi vıse-mınıstri Salıdat Qaıyrbekova, medısına salasyndaǵy joǵary oqý oryndary men ǵylymı mekemeler basshylary, aýyl dárigerleri, jańashyl medıkter, alǵashqy medısınalyq-sanıtarlyq kómek kórsetý jáne sanıtarlyq avıasııa dárigerleri, farmasııa mamandary qatysty. Kezdesý barysynda densaýlyq saqtaý salasyna, sonyń ishinde alǵashqy medısınalyq kómek kórsetýge, óńirlik ǵylymı mamandandyrylǵan medısınalyq uıymdar men aýyldyq medısınalyq mekemeler jumysyna baılanysty jáne ózge de ózekti máseleler talqylandy. Gúlshara Ábdiqalyqova óz quttyqtaý sózinde ult densaýlyǵy memlekettik saıasattyń mańyzdy basymdyǵynyń biri bolyp tabylatynyn atap ótti. Qazaqstannyń áleýmettik-ekonomıkalyq tabysty damýy jáne 2050 jylǵa qaraı álemniń eń damyǵan ozyq 30 eli qataryna qosylýy densaýlyq saqtaý salasyn jańǵyrtýmen tikeleı baılanysty. Bıylǵy jyly «Salamatty Qazaqstan» memlekettik baǵdarlamasyn júzege asyrý aıaqtalatyny belgili. Osy jyldar ishinde Densaýlyq saqtaýdyń biryńǵaı ulttyq júıesi quryldy. Ol medısınalyq mekemeni tańdaý erkindigi, medısınalyq kómek kórsetý sharalarynyń ashyqtyǵy, medısınalyq qyzmet kórsetý isinde básekelestik orta qalyptastyrý, medısınalyq qyzmet kórsetýdiń kólemi men sapasyna qaraı aqyrǵy nátıjege sáıkes qarjylandyrý qaǵıdattaryna negizdelgen. Memleket basshysy 2014 jyly Qazaqstan halqyna arnaǵan «Qazaqstan joly – 2050: Bir maqsat, bir múdde, bir bolashaq» atty joldaýynda atap ótkendeı, tek «salaýatty ómir saltyn ornyqtyrý jáne medısınany damytý ǵana qazaqstandyqtardyń ómir súrý jasyn uzartýǵa múmkindik týǵyzady». Sońǵy 5 jylda qazaqstandyqtardyń ómir jasynyń uzarýy otandyq medısınada qol jetkizilgen tabystyń aıǵaǵy bolyp otyr. О́mir jasynyń uzaqtyǵy 3 jylǵa artyp, 2014 jyly 71,6 jasty qurady. 2010 jylmen salystyrǵanda ana ólimi 2 ese, bala ólimi 1,7 ese azaıdy. Qazaqstan 2011 jyly Myńjyldyq damýdyń tórtinshi jáne besinshi maqsattaryna merziminen buryn qol jetkizdi. Talqylaý qorytyndysy boıynsha Memlekettik hatshy quzyrly memlekettik organdarǵa birqatar naqty tapsyrma berdi. Kezdesý sońynda Gúlshara Ábdiqalyqova medısına qyzmetkerlerin aldaǵy kásibı merekelerimen quttyqtap, zor densaýlyq jáne el ıgiligi jolyndaǵy jumystaryna tabys tiledi. Talǵat Raıymbek. Derek: akorda.kz. Sýret: «QazAqparat».