Sýret: gov.kz
- Jýyrda ǵana ÝEFA Chempıondar lıgasynyń toptyq týrnırinde ekinshi oryn alyp, «Tórttik fınalynyń» joldamasynan qaǵylǵan «Semeı» fýtzal klýby kelesi jyly sol olqylyqtyń ornyn toltyrýǵa myqtap kiristi. Kúni keshe ǵana Abaı oblysynda jasaqtalǵan komanda óz qataryn 24 jastaǵy Reseı quramasynyń beldi múshesi Kamıl Gereıhanovpen tolyqtyrdy. Buǵan deıin «Tıýmen» klýbynda óner kórsetken ol óz eliniń chempıony atanyp, jasóspirimder Olımpıadasynda kúmis medaldy ıelengen.
- Gandboldan Nıý-Delıde ótip jatqan Azııa chempıonatynda elimizdiń áıelder quramasy ekinshi kezdesýinde Ońtústik Koreıadan 20:30 esebimen utyldy. Alǵashqy matchta jerlesterimiz Qytaıdy qapy qaldyrǵan edi. Endi olar Sıngapýrmen saıysqa túsedi. Ár toptan úzdik shyqqan eki komanda pleı-off básekesinde baq synaıdy.
- Erteń Beıjińde short-trekten World Tour serııasynyń úshinshi kezeńi bastalady. Bul jarysta elimizdiń namysyn Denıs Nıkısha, Abzal Ájiǵalıev, Mersaıd Jaqsybaev, Ádil Ǵalıahmetov, Gleb Ivchenko, Aıbek Násen, Olga Tıhonova, Iаna Han, Málıka Ermek, Alına Ájiǵalıeva, Mádına Janbosynova, Zeınep Qumarqan qorǵaıdy.
- Tanymal fýtbolshy Samat Smaqov Taldyqorǵannyń «Jetisý» klýbynyń bas bapkeri bolyp taǵaıyndaldy. Kezinde ol «Elimaı», «Ertis», «Rostselmash» (Reseı), «Jeńis», «Qaırat», «Aqtóbe», «Rızespor» (Túrkııa), «Ordabasynda» oınady. 16 jyl boıy ulttyq quramanyń namysyn qorǵap, 76 ret jasyl alańǵa shyqty. Bul – rekordtyq kórsetkish. Keıinde elimizdiń birqatar komandasynda dırektor boldy, jattyqtyrýshylyq qyzmet atqardy.
- Qurlyqtyq hokkeı lıgasynda (QHL) kúsh synasyp júrgen «Barys» qatarynan altynshy ret jeńildi. Bul joly elordalyq klýb Astanada Máskeýdiń «Spartagynan» 2:4 esebimen utyldy. Kelesi oıynyn «Barys» erteń Cherepoveste jergilikti «Severstalǵa» qarsy ótkizedi.
- Voleıboldan Ulttyq lıganyń II týrynyń alǵashqy kúni aıaqtaldy. Bul básekelerde mynadaı esepter tirkeldi: «Jetisý» – «Arý-Astana» 3:0 (25:17, 25:21, 25:14), «Qýanysh» – «Almaty» 3:0 (25:18, 25:20, 25:19), «Ertis» – «Grasııa KZ» 0:3 (23:25, 21:25, 15:25), «Turan» – «Aqtóbe» 2:3 (17:25, 25:16, 25:17, 18:25, 12:15), «Berel» – «Qaraǵandy» 3:0 (25:8, 25:21, 25:16).
- Aty-jóni oryssha bolǵanymen tegi qazaq Sergeı Lıpınes (18-3-1, 13 KO) kásipqoı rıngtegi kelesi kezdesýin keler jyldyń 1 aqpanynda Londondaǵy «Ýemblı Arenada» ótkizedi. Áli jeńilistiń kermek dámin tatpaǵan Ulybrıtanııanyń ókili Adam Azımmen (12-0, 9 KO), aıqasady. Birinshi jartylaı orta salmaqta ótetin básekede IBO nusqasy boıynsha chempıondyq belbeýdiń ıegeri anyqtalady.
- VTB lıgasynda baq synap júrgen «Astana» basketbolshylary Qazanda jergilikti ÝNIKS-ten baqandaı 53 upaı aıyrmashylyǵymen utyldy. Esep – 38:91 (12:26, 6:13, 10:30, 10:22). Osylaısha, elimizde jasaqtalyp, memlekettik bıýdjetten qyrýar qarjy alyp otyrǵan komanda bıylǵy maýsymda qatarynan 17 kezdesýde jeńilis tapty.
- 2025 jyly AQSh-ta jalaýy jelbireıtin klýbtyq álem chempıonatyna qatysatyn komandalar qandaı sebetke túskeni belgili boldy: 1 sebet – «Manchester Sıtı» (Anglııa), «Real» (Ispanııa), «Bavarııa» (Germanııa), PSJ (Fransııa), «Flamengo» (Brazılııa), «Palmeıras» (Brazılııa), «Rıver Pleıt» (Argentına), «Flýmınense» (Brazılııa). 2 sebet – «Chelsı» (Anglııa), «Borýssııa» (Germanııa), «Inter» (Italııa), «Portý» (Portýgalııa), «Atletıko» (Ispanııa), «Benfıka» (Portýgalııa), «Iýventýs» (Italııa), «Red Býll Zalsbýrg» (Aýstrııa). 3 sebet – «Ál-Hılal» (Saýd Arabııasy), «Ýlsan Hendaı» (Ońtústik Koreıa), «Ál-Ahlı» (Mysyr), «Vıdad» (Marokko), «Montereı» (Meksıka), «Leon» (Meksıka), «Boka Hýnıors» (Argentına), «Botafogo» (Brazılııa). 4 sebet – «Ýrava Red Daımonds» (Japonııa), «Ál-Aın» (BAÁ), «Esperans» (Týnıs), «Mamelodı Sandaýns» (OAR), «Pachýka» (Meksıka), «Sıetl Saýnders» (AQSh), «Oklend Sıtı» (Jańa Zelandııa), «Inter Maıamı» (AQSh).
