Temirjol ózinshe bir álem. Munda atakásip pen ana isi erekshe baǵalanady. Júıeniń qurylymy burynǵydan da, búgingiden de bólek. Saladaǵy eńbek ótili sanalǵanda tutas áýlettiń eńbek joly esepke alynady. Temirjolshy áýleti osylaı qalyptasady.
Burynǵy Selınograd qalasynda 1974 jyly týyp, Astanada azamat bolyp qalyptasqan Arman 1990–1993 jyldary temirjol ýchılıshesiniń elektromonter, baılanys bóliminde bilim aldy. Eńbek jolyn 1992–1993 jyldary temirjol salasynda tájirıbeden ótýden bastady.
«Men óz erkimmen júk sehynda tájirıbeden ótýime ruqsat suradym. Ol kezde anam Kúlásh Abdýllına biz barǵan dıstansııanyń kommersııalyq baqylaý pýnktiniń brıgadıri edi. Álbette, arnaýly bilim oshaǵynda dáris bergen ustazdarymnyń sińirgen bilimi men eńbeginiń orny bólek. Degenmen temirjol boıyndaǵy basty ustazym týǵan anam boldy dep maqtanyshpen aıta alamyn. Ol kisi qazir zeınet demalysynda. Eldegi eń mártebeli ataqtyń biri – «Qurmetti temirjolshy», dedi Arman Tileýlemuly.
Armannyń aıtýynsha, atasy Asqar Abdýllauly Ekinshi dúnıejúzilik soǵys jyldary júk poıyzdarynda jolserik bolsa, naǵashy atasy Qabdrash Aznabaıuly dál sol kezeńde shoıyn jol magıstrali ústinde temirjolshy qyzmetin atqarǵan. Abdýllınder áýletiniń shoıyn joldaǵy jalpy eńbek ótili 100 jyldan ári asyp jyǵylady. Sebebi Armannyń týǵan qaryndasy men inisi de atakásipti ustaǵandar. Áıtse de, bertinde zamana aǵymyna qaraı tirshilik kózin ózgertip, jeke kásipterin ashyp, bıznespen shuǵyldanyp ketken.
Arman ýchılısheni oıdaǵydaı támamdaǵan soń, mamandyǵy boıynsha Belgi berý jáne baılanys dıstansııasynda bir jylǵa jýyq jumys istedi. Odan keıin qaıtadan júk sehyna surandy. Sol jerde qarapaıym poıyz qabyldaýshy qyzmetin atqardy. Birneshe jyldan keıin qozǵalys sehyna jumysqa aýysyp, onda da qalypty eńbek etti. Dese de ózi qalaǵan poıyz qurastyrýshy qyzmetine qoly jete qoımady. Sebebi ol oryn mol tájirıbemen qatar, kásibı joǵary biliktilikti de talap etetin edi.
Sóz basynda aıtqanymyzdaı, naǵyz temirjolshy bolý úshin salanyń bir-birimen sabaqtasqan san salaly mamandyǵyn sheber meńgerip, sharýasyn ilkimdi úılestirip, báriniń údesinen shyǵa alatyndaı onqol azamat bolý kerek. Osy oraıda Arman: «О́zim qalaǵan qyzmetke qol jetkizýim úshin temirjoldaǵy dástúrge aınalǵan tártippen bes-alty salada jumys istep, árbirinen tıisti deńgeıde tájirıbe jınaqtaýym kerek boldy. Sony durys atqarǵan shyǵarmyn, jan qumarym men kásiptik maqsatym bolǵan qyzmet baspaldaǵyna aıaq qoıyp, poıyz qurastyrýshynyń orynbasarlyǵyna deıin erkin kóterildim», deıdi.
Biraq sonda da qalaýyna bir qadam qalǵanda qaıta sheginis jasap, temirjol operatory bolyp jumys isteýine týra keldi. Odan keıin 1-, 2-, 3-pozısııada alma-kezek eńbek etti. Oǵan qosa suryptaý stansasynda qyzmetin jalǵastyryp, onynshy aýdanda jaýapty kezekshi boldy. Munyń bári kásibıligin bekemdep, biliktiligin arttyrýǵa septigin tıgizdi. Sonyń arqasynda qazirde poıyz qurastyrýshy qyzmetin qınalmaı atqaryp keledi. Bul qyzmetke kiriskenine de 10 jyldan asypty. Eńbegin joǵary baǵalaǵan kompanııa basshylyǵy Alǵyshatpen, Qurmet gramotasymen marapattady.
Shoıyn jol ústindegi eńbek ótili 30 jyldan asqan Arman jan jary Elena Mıhaılovnamen mektep jasyndaǵy úsh perzentin tárbıelep otyr. Jumystan qoly bosaǵanda otbasyn túgel kólikke otyrǵyzyp alyp, ý-shýy kóp, aýasy tymyrsyq Astanadan alystaý jerge, tabıǵat aıasyna shyǵyp ketkendi jany qalaıdy. Keń dalaǵa shyqqanda keýdesi kók tunbaǵa tolyp óleń oqıdy. Odan keıin kól jaǵalap balyq aýlaǵandy jaqsy kóredi. Ol oıy júzege aspaı qalsa, oıly kórshilerin shaqyryp, shahmat taqtasyn jaıady.
