Baıqaýdyń erejesi boıynsha oqýshylar aldymen sheshendik sózdi aǵylshyn tiline aýdaryp jiberdi. Ony birneshe sarapshy aldyn ala qarady. 2-kezeńde qatysýshylar baıqaýǵa usynǵan ǵıbratty áńgimeni áýeli qazaq tilinde qatesiz, saýatty, mánerlep jatqa aıtyp berdi. Odan keıin sarapshylar aýdarmamen aldyn ala tanysyp, oqýshynyń aıtý sheberligine mán berdi. Soǵan saı júldeli oryndar anyqtaldy.
Qysqasy, saıysty baǵalaýshylar qatysýshylardyń sheshendik sózderdi túsiný deńgeıine, aýdarmanyń túpnusqaǵa jaqyndyǵyna, sapasy men aıtý sheberligine, saýaldarǵa qazaqsha, aǵylshynsha jyldam jáne saýatty jaýap berýine mańyz berdi. Joba avtory, respýblıkalyq Abaı mektebiniń «Sheshendik óner» pániniń muǵalimi, «Dilmar» sheshendik ónerdi damytý klýbynyń negizin qalaýshy, jýrnalıst Jarqyn Sálenulynyń aıtýynsha, baıqaýdyń basty maqsaty – babalar murasyn ózi jete, tereń túsine otyryp, ony aǵylshyn tilinde saýatty nasıhattaı alatyn jańa býyndy qalyptastyrý.
Saıystyń ashylýynda sóz alǵan Abaı atyndaǵy respýblıkalyq mamandandyrylǵan mektep-ınternatynyń dırektory Jeńiskúl Temirhanqyzy saıystyń mańyzyna toqtalyp, qatysýshylarǵa jyly lebizin bildirdi. Sondaı-aq tanymal kásipker, «Assyltas» qoǵamdyq qorynyń quryltaıshysy Dýlat Tastekeı qazaq bı-sheshenderiniń danalyq sózderinde qanshama ǵıbrat alar taǵylymdy oı jatqanyn aıtyp, oqýshylardy shabyttandyrdy.
Sonymen, baıqaý qorytyndysy boıynsha Batys Qazaqstan oblysyndaǵy Abaı mektebiniń oqýshysy Gúlim Múbárak top jaryp, birinshi oryndy ıelendi. Ekinshi oryn – respýblıkalyq Abaı mektebiniń oqýshysy Aısymbat Taqylbekqyzy men Shymkent qalasyndaǵy 90-gımnazııanyń oqýshysy
Albına Berdihanǵa buıyrdy. Al qalǵan 6 oqýshy úshinshi oryndy qanaǵat tutty. Saıysqa M.Áýezov atyndaǵy Ońtústik Qazaqstan ýnıversıtetiniń dosenti, PhD Nurlybek Sraıyluly qoldaý kórsetti. Joba avtory keler jyly qoldaýshylar men demeýshiler tabylsa, baıqaýdy jalpy respýblıkalyq deńgeıde ótkizýge nıetti ekenin jetkizdi.
