1978 jyly qurylǵan óner ujymynyń astarly ázilin, ýytty qoıylymdaryn tamashalaýǵa kelgenderdiń qatary qalyń boldy. Tamasha akterleri qoǵamdaǵy túrli keleńsiz jaǵdaılardy ázilge aınaldyryp, jınalǵandardyń ezýine kúlki úıirdi. Kórermen de san jyldar boıy saǵynǵan akterlerin kórip, uzaq shapalaq soǵyp qurmet kórsetti.
Sahna shymyldyǵyn Tuńǵyshbaı Jamanqulov pen Lıdııa Kádenova ashty. Gúlbaýshan Tileýbekova, Danagúl Temirsultanova, Asylbek Boranbaı, Marat Kókkózov, Nurjan Tutov kórermenderge ázil-qaljyńyn aıtyp, kóńilderin bir jelpindirip tastady. Bir kezderi oınaǵan qoıylymdaryn qaıta qoıyp kórermendi ótken jyldarǵa jetelep, kúlkige qarq etti.
«Tamasha bolady degendi estı sala, bılet aldyq. Kesh keremet ótti. Búgin respýblıka saraıyna jınalǵan qaýym erekshe nostalgııaǵa bólendi dep oılaımyn. Akterlerdiń ónerin tamashalap otyryp, burynǵy kezder kóz aldyma elestedi. Saǵynyp qalyppyz», deıdi almatylyq kórermen Rázııa Qydyrbaıqyzy.
Júzdegen talantyń juldyzyn jaqqan «Tamasha» ázil-syqaq teatrynyń mereıtoıyna arnalǵan keshte Roza Rymbaeva, Aıjan Nurmaǵambetova, Ulyqpan Joldasov, Tamara Asar, Tolqyn Zabırova syndy ánshiler men «Dos-Muqasan», «Úrker» tobynyń oryndaýyndaǵy ánder keshtiń ajaryn asha tústi.
«Qazir jas ázil-syqaq teatry kóp. Biraq «Tamashanyń» orny bólek. Búgin bizdiń súıikti teatrymyz qaıta oraldy. «Tamashanyń» sahanasyn saǵyndyq. «Tamasha» jasaı bersin», dedi Roza Rymbaeva.
Astarly ázil, oı salarlyq qaljyńymen kórermenniń júreginen jol taýyp, kópshiliktiń súıispenshiligine bólengen teatrdyń keshine kelgen óner súıer qaýym qımastyq kóńilmen tarqasty.
Dýmandy keshtiń televızııalyq nusqasyn 31 jeltoqsan kúni «Jibek Joly» arnasynan kórýge bolady.
Eske salaıyq, 30 qarashadan bastap Jibek Joly telearnasynan aty ańyzǵa aınalǵan «Tamasha» týraly serıal kórsetile bastady.
