Er mereıin ósirgen maqala

Ol – Qaraǵandynyń týmasy. Ta­nysqan bette-aq Al­mastyń zııaly otbasyn­da týyp-óskeni birden baıqaldy. Tili baı, sózge sheshen, oı-óresi bıik. Jasy áli 20-ǵa tolmaǵan sportshymen júzdesseń, tartymdy áńgimeniń tıegin aǵytyp, paıymdy pikir aıtyp, janyndaǵy adamdardy ózine eriksiz baýrap alady. Suhbat berse de, sheshile sóıleıdi. Keıin bildik, balýannyń ata-anasy da tegin adamdar emes eken. Ákesi Jeńis Qamenuly – tehnıka ǵylymdarynyń kandıdaty, dosent, uzaq jyl Qaraǵandy tehnıkalyq ýnıversıtetiniń Taý-ken ma­shınaqurylysy kafedrasynda eńbek etken. Anasy Gúlshara Muqysheva – tehnıka ǵylymdarynyń doktory, professor, Qaraǵandydaǵy tehnıkalyq lıseı dırektory jáne joǵaryda atalǵan ýnıversıtettiń kásipodaq komıtetiniń tóraǵasy. Al­mas­tyń ózi de bilimge qushtar. Úsh-tórt oqý ornyn támam­daǵan, birneshe shet tilin erkin meńgergen. Qa­shan kórseń de qolynan kitap tús­peıdi. Únemi oqyp, zerttep, zerdelep, izdenip júredi.

Almas Álsenovtiń sport­­tyq kórsetkishteri de jaq­sy. Jastar arasynda bir­qa­tar halyqaralyq týrnırde jeńis tuǵyryna kóterilip, eresekterdiń el chempıonatynda júldegerler sanatyna qosylǵannan keıin ulttyq qurama sapyna qabyldandy. Áýeli 90 kg, odan keıin 100 kg salmaq dárejesinde kúres­ti. Ýaqyt oza elimizdiń betke­ustar dzıýdoshylarynyń birine aınaldy. Sol kezderi tulǵasy kelisken, bitim-bol­mysy bólek balýan jaıynda «Egemen Qazaqstanǵa» maqala jazǵan edik.

Ǵasyrlar toǵysynan beri Ál­senovpen kezdesýdiń bir reti kelmedi. Ara-tura túr­li jarysta júlde alyp júr­geni týraly estip júrdik. Oǵan syrttaı qýandyq. Tata­mıde ózine buıyrǵan nesibe­sin alǵannan keıin dzıýdomen qosh aıtysqanymen, úlken sporttan alystaǵan joq. Ár jyldary Almas Jeńisuly Qazaqstan dzıýdo federasııasynyń vıse-prezıdenti, Azııa dzıýdo oda­ǵynyń marketıng boıyn­sha dırektory, Eýropa dzıýdo odaǵy prezıdentiniń keńes­shisi qyzmetterin abyroıly atqardy. Qaraǵandyda «Jeńis» kásipqoı dzıýdo klýbyn qurdy. Bir sózben aıtsaq, osy sport túriniń damýyna barynsha úles qosty.

Almaspen arada baqandaı 20 jyl ótkennen keıin ǵana jo­lyǵýdyń sáti tústi. Byl­tyr jeltoqsan aıynda Al­ma­­tydaǵy Balýan Sholaq atyn­daǵy sport saraıynda «Jeńis kýbogi» dep atalatyn dzıý­doshylardyń dúbirli dodasy dúrkirep turyp ótti. Sonyń basy-qasynda A.Álsenov te júrdi. Kezinde men kórgen bozbala ómirdiń biraz ótke­linen ótip, bıznes pen basshy­lyq qyzmette ábden ysyl­ǵan naǵyz maıtalmanǵa aına­lypty. Qazirgi kezde Al­mas Jeńis­uly jer-jahan­daǵy 198 memlekettiń ult­tyq uıymdarynyń basyn bi­rik­tirip otyrǵan Halyq­aralyq dzıýdo federasııasy (IJF) pre­zıdentiniń keńesshisi qyzmetin atqaryp júr.

Meni kórgen bette ol bir­den: «Bul – bizdiń jýrnalıst aǵamyz. Kezinde eń al­ǵashqy bolyp meni respýblı­kamyzdyń bas basylymy «Egemen Qazaqstanǵa» jazyp, mereıimdi bir ósirip tastaǵan. Bul maqala maǵan erekshe motıvasııa berdi. Sol gazettiń qıyndysy mende áli de saq­taýly» dep aınalasyndaǵy adamdarmen tanystyrdy. Sol kezde baıqaǵanym, Al­mas­tyń júris-turysy men syrtqy pishimi ózgergenimen, jandúnıesi men kóńili sol qalpynda eken. Sol baıaǵy ańqyldaǵan Almas!

Shyny kerek, búgingi tań­da IJF prezıdenti keńesshi­sinen dál osyndaı maqtaý sóz kút­pegen edim. Jazǵan maqalam da gazettiń bir buryshyn alyp jatqan shaǵyn ǵana dúnıe edi. Sonda da keıipkerim eńbegimdi baǵalap, óziniń «Egemen Qa­zaq­stanǵa» shyqqanyn zor már­tebe sanaǵan. El gaze­tinde shyqqan maqala sportshy­larǵa kúsh-qaırat, jiger syılaıdy eken. Soǵan kádimgi­deı marqaıyp qaldym. Mine, el gazetinde jaryq kórgen sha­ǵyn ǵana maqalanyń, Almas Álsenovpen 20 jyldan keıin qaıta kezdesýimizdiń tarıhy osyndaı!