Jetisý jerinde tek qalalyq aımaqtarda ǵana emes, shalǵaı aýdandarda da múmkindigi shekteýli jandarǵa jan-jaqty jaǵdaı qarastyrylǵan. Bıyl shıpaly Alakól kóliniń mańaıyndaǵy saýyqtyrý ortalyǵynda erekshe kútimdi qajet etetin birneshe bala demalyp qaıtqan edi. Endi mine, Jarkent topyraǵynda qazaqy emdeý tásilin paıdalanatyn ıppoterapııa ortalyǵy jumys isteıdi. Atalǵan nysan qaladaǵy «Mereı» balalardy ońaltý ortalyǵynyń bazasynda ornalasqan. Ortalyqtyń ashylýyna oblystyq jumyspen qamtýdy úılestirý jáne áleýmettik baǵdarlamalar basqarmasy qoldaý kórsetken.
«Erekshe qajettilikteri bar balanyń dúnıege kelýi – ata-anaǵa úlken jaýapkershilik, syn. Ondaı balalardyń qoǵamnyń tolyqqandy múshesi bolyp ósýine memleketimiz qoldan keletin barlyq jaǵdaıdy jasap keledi. Ońaltý ortalyqtarynyń, túzetý kabınetteriniń qyzmeti arqyly balalar densaýlyǵyn jaqsartýǵa, paıdaly daǵdylardy ıgerýge, qoǵamǵa beıimdelýge naqty múmkindik alyp otyr. Osy rette Jarkentte ashylǵan búgingi ıppoterapııa ortalyǵynyń da úlesi zor bolady dep senemiz», dedi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Sanııa Dúısenbiqyzy.
Ortalyq dırektory Gúlnaz Kıbraevanyń aıtýynsha, aýdany 400 sharshy metr bolatyn angarlyq tıptegi jabyq manej sapaly jylý oqshaýlaǵysh materıaldardan qysqa merzim ishinde turǵyzylǵan. Bul ıppoterapııa sabaqtaryn qysta da ótkizýge múmkindik beredi.
«Mereı» balalardy ońaltý ortalyǵy 2022 jyly ashyldy. Munda sodan beri 40 tárbıelenýshi beıimdeý men ońaltýdan turaqty túrde ótip keledi. Solardyń tórteýi qoǵamǵa sátti beıimdelip, mektepke, balabaqshaǵa baryp júr. Endi mine, ortalyqtyń em sharalaryna ıppoterapııa baǵyty qosylyp otyr. Balalar ıppoterapııadan em alsa, aıaqqa turyp júrýi jaqsarady, arqa bulshyq etteri nyǵaıa túsedi, vestıbýlıarlyq apparaty jattyqtyrylady. Jalpy, ıppoterapııa densaýlyqty jaqsartýmen qatar, adamnyń odan ári damýyna úlken yqpal etedi», deıdi G.Kıbraeva.
Adaptıvti atpen júrý sabaqtaryn aptasyna úsh ret ótkizý josparlanǵan. Osy maqsatta ortalyq basshylyǵy erekshe qajettiligi bar balalarǵa kómektesýge yqylas bildirgen «Beknur» sharýa qojalyǵynan Aqboz, Admıral atty eki jylqyny jalǵa alyp otyr. Bul jylqylardy paıdalanýǵa medısınalyq bilimi bar emdik dene shynyqtyrýdyń tájirıbeli eki nusqaýshysy kómektesedi.
О́z kezeginde psıhologterdiń, dárigerlerdiń qorytyndysy men usynystary boıynsha balalar em alyp, atqa minýdi bastaıdy. Máselen, tórt jasar Mádıdi ájesi Shákızat Slamjanova ortalyqqa bir jarym jasynda alyp kelgen. Bala alǵashynda aıaǵyn basyp júre almaǵan, aınalasymen qarym-qatynasy da qıyn bolatyn. О́zge de ońaltý sharalarymen qatar Mádı búgin nusqaýshylardyń kómegimen alǵash ret atqa otyryp, ıppoterapııany bastady.
Sol sııaqty 8 jasar Madııardyń anasy Maqpal О́skenbaeva da álemge tanymal osy ońaltý ádisi balalarǵa kómektesetinine senimdi. «Biz ıppoterapııa ashý ıdeıasy qolǵa alynatyny týraly alǵash ret ótken jyly estidik. Oblys basshylyǵynyń qoldaýymen osy ıgi bastama iske asyrylǵanyna qýanyshtymyz. Mundaǵy materıaldyq-tehnıkalyq jaraqtandyrý, zamanaýı jabdyqtar men trenajerler, emdik dene shynyqtyrýlary balalarymyzdyń saýyǵýyna, óz-ózine degen senimderin nyǵaıtýǵa yqpal etedi degen úmitpen kelip otyrmyz», dedi M.О́skenbaeva.
Manejde montýar, ıaǵnı balalardy atqa otyrǵyzýǵa arnalǵan arnaıy baspaldaq ornatylyp, qaýipsizdik maqsatynda jattyǵý alańyna qum tóselgen. Sonymen qatar munda jaryqtandyrý júıesi bar, ata-analar men mamandar prosesti syrttan baqylaı alatyndaı qorshaýlar ornatylǵan.
О́ńir ákimi baspasóz qyzmetiniń málimetinshe, búginde «Mereı» ortalyǵynda tirek-qımyl apparaty zaqymdanǵan, Daýn sındromy, basqa da aýrýlary bar 3 jastan 18 jasqa deıingi balalarǵa 56 bilikti maman kómek kórsetedi. Olardyń ishinde pedagog-tárbıeshi, ádisker, dáriger-nevropatolog, pedagog-psıholog, logoped, psıhıatr, defektolog, ortoped, massajıst, emdik dene shynyqtyrý, júzý nusqaýshylary, dene shynyqtyrý oqytýshysy, sondaı-aq orta medısınalyq qyzmetkerler bar. Tárbıelenýshilerge yńǵaıly bolý úshin balalardy qaýipsiz tasymaldaýǵa beıimdelgen eki «Vıraj» GAZel kóligi qarastyrylǵan.
Jetisý oblysy
