Is-shara aıasynda 2027-2030 jyldarǵa arnalǵan Qazaqstannyń ǵylymı jáne tehnologııalyq damýynyń basym baǵyttaryn talqylaý jáne UǴA tarapynan júrgizilgen forsaıt-zertteýlerdiń nátıjeleri jarııalandy.
Forým ǵylym salasyn damytýdaǵy forsaıttyq zertteýlerge qatysty máselelerdi talqylaý maqsatynda uıymdastyrylǵanyn atap ótken UǴA prezıdenti Aqylbek Kúrishbaev:
«Qazirgi tańda ǵylymı-tehnologııalyq forsaıt bolashaqtaǵy ǵylymı jáne tehnologııalyq úrdisterdi boljaý men taldaýǵa negizdelip otyr. Ol aǵymdaǵy jetistikterdi baǵalaýdy, perspektıvalyq baǵyttardy anyqtaýdy jáne olardy júzege asyrý strategııalaryn ázirleýdi qamtıdy. Forsaıt úkimetke, kompanııalarǵa jáne ǵylymı uıymdarǵa dáıekti sheshimder qabyldaýǵa, ǵylym men tehnologııaǵa uzaq merzimdi ınvestısııa tartýdy josparlaýǵa kómektesedi. Forsaıt júrgizý úshin aqparattyq, kommýnıkasııalyq jáne ǵaryshtyq tehnologııalar; ómir jáne densaýlyq týraly ǵylym; agroónerkásiptik keshendi turaqty damytý jáne aýyl sharýashylyǵy ónimderiniń qaýipsizdigi; sý resýrstaryn, janýarlar men ósimdikter dúnıesin utymdy paıdalaný, ekologııa; geologııa, paıdaly qazbalardy óndirý jáne qaıta óńdeý, jańa materıaldar, tehnologııalar; energetıka jáne mashına jasaý salalary tańdaldy. Aldaǵy ýaqytta forsaıttyq zertteýlermen basqa da baǵyttar qamtylatyn bolady. Akademııa 30 forsaıt-sessııa ótkizip, 1100-den astam suhbat júrgizdi. Bul 200-den astam perspektıvalyq ǵylymı mindetterdi aıqyndaýǵa múmkindik berip otyr» dep atap ótti.
Osylaısha forsaıttyq zertteýler jańasha oı qalyptastyrý men bolashaqty jobalaýdyń quralyna aınalyp otyr. Elimizde bıyl qabyldanǵan «Ǵylym jáne tehnologııalyq saıasat týraly» Zańnyń negizinde forsaıttyq zertteýler júrgizý fýnksııasy Ulttyq ǵylym akademııasynyń quzyryna berilgen.
Forým qatysýshylaryna joldaǵan quttyqtaý sózinde Ǵylym jáne joǵary bilim mınıstri Saıasat Nurbek ǵylymdy damytýdyń mańyzyn, elimizdiń básekege qabiletti áleýetin arttyrý úshin túıtkildi máselelerdi talqylaý, startegııalardy anyqtaýdyń róli týraly atap ótse, Aýyl sharýashylyǵy vıse-mınıstri Baǵlan Bekbaýov agrarlyq ǵylymnyń el damýyndaǵy róline toqtalyp, birlesken jumystardyń nátıjesine senim bildirdi.
Densaýlyq saqtaý vıse-mınıstri Tımýr Muratov Muratuly medısınalyq ǵylym máselesine toqtaldy. Osy oraıda medısınalyq ǵylymdy qarjylandyrý, ǵylymı ınfraqurylymdy jetildirý men kadr daıarlaýdyń mańyzyn atap ótti.
Ulttyq ǵylym akademııasy 2023 jyly pre-forsaıt boıynsha daıyndyq jumystaryn júrgizip, aldyńǵy zertteýlerge taldaý júrgize otyryp, ǵylymı-ınnovasııalyq ekojúıege sholý jasady. Bıyl Qazaqstan úshin basym 6 baǵyt boıynsha ǵylymnyń forsaıty bastalyp, onyń qorytyndy nátıjeleri jarııalandy.
Zertteýlermen keńinen qamtý maqsatynda Ulttyq ǵylym akademııasy kelesi jyly forsaıtıngtiń óńirlik jelisin qurýdy josparlap otyr. Bıyl S.Amanjolov atyndaǵy Shyǵys Qazaqstan ýnıversıtetiniń bazasynda alǵashqy forsaıt ortalyǵy ashyldy. Kelesi jyly iri óńirlik ýnıversıtetter bazasynda taǵy 7 forsaıt ortalyq ashý josparlanyp otyr.
Kelesi jyldan bastap UǴA osy baǵyttaǵy álemdik jetekshi ınstıtýttardyń biri - Koreı ǵylymı-tehnıkalyq aqparat ınstıtýtymen (KISTI) forsaıttyń aqparattyq-taldamalyq júıesin qurý jónindegi birlesken joba iske asyrady. KISTI - Ońtústik Koreıadaǵy ǵylymı-tehnıkalyq aqparatty jınaýmen, taldaýmen jáne taratýmen aınalysatyn jetekshi ǵylymı-zertteý ınstıtýty.
Forýmda Koreı ǵylymı-tehnıkalyq aqparat ınstıtýty men Ulttyq ǵylym akademııasy forsaıttyń aqparattyq-taldamalyq júıesin qurý jónindegi memorandýmǵa qol qoıdy.
Forýmda elimiz, sondaı-aq shetelderden qatysqan ǵalymdar óz tájirıbesimen bólisip, ǵylymı yqpaldastyq týraly pikirlerin ortaǵa saldy.
