Kezdesý barysynda qazaqstandyq ónimderge BAÁ naryǵynda suranys artyp kele jatqany aıtyldy. Arman Shaqqalıev elimizdiń organıkalyq aýyl sharýashylyǵy ónimderin, sonyń ishinde BAÁ-de tanymal salqyndatylǵan qoı etin, sonymen qatar, joǵary sapaly un, kúnbaǵys maıy, kondıterlik ónimder jáne sút ónimderin eksporttaýǵa daıyn ekenin aıtty.
«2024 jyldyń 10 aıynda qoı etiniń eksporty 13,3 myń tonna bolyp, jalpy quny 45,3 mln dollardy qurady. О́tken jyldyń sáıkes kezeńimen salystyrǵanda kólem eki ese, eksporttyq túsim 64%-ǵa artty. Biz halal standarttar aıasynda ónimderge sertıfıkat berý boıynsha jumystardy belsendi atqarýdamyz. 2014 jyldan beri 1800-den astam qazaqstandyq jáne sheteldik kompanııa sertıfıkattaýdan ótti, bul Qazaqstan ónimderiniń joǵary sapasy men halyqaralyq standarttarǵa sáıkestigin dáleldeıdi», dep atap ótti Mınıstr.
Kezdesý barysynda «QazTrade» AQ bas dırektory Jenıs О́serbaı Qazaqstannyń eksporttyq áleýetin tanystyryp, BAÁ naryǵyna shyǵýdyń negizgi baǵyttaryn atady. Ol otandyq eksporttaýshylardy akkredıtasııalaý, sertıfıkattaý jáne ónimderdi tańbalaý máselelerinde qoldaý kórsetýdiń mańyzdylyǵyn, sondaı-aq Qazaqstandyq óndirýshilerdiń Gulfood jáne ADIPEC sııaqty iri halyqaralyq kórmelerge qatysýyn uıymdastyrý týraly aıtty. Sonymen qatar, Qazaqstan taýarlaryn BAÁ-diń LuLu jáne Grandiose sııaqty saýda jelilerine shyǵarý máseleleri de talqylandy.
BAÁ Memlekettik syrtqy saýda mınıstri saýda úılerin turaqty ókildikter retinde qurýdyń mańyzdylyǵyn, bul ádis ónimderdi tıimdi jyljytýǵa jáne jergilikti tutynýshylardyń qajettilikterin eskerýge múmkindik beretinin aıtty.
Kezdesý barysynda qazaqstandyq ónimderdiń degýstasııasy ótti. Qatysýshylar usynylǵan qoı eti, kondıterlik ónimder jáne almalardyń sapasy men dámine joǵary baǵa berdi.
