Resmı shara barysynda Ǵylym jáne joǵary bilim mınıstri Saıasat Nurbektiń ǵalymdardy quttyqtaýyn vıse-mınıstr Darhan Ahmet-Zákı jetkizip, ǵylym aldynda turǵan keleli mindetterge toqtalsa, Almaty qalasy ákiminiń orynbasary Azamat Qaldybekov quttyqtaý sózin arnady.
Alqaly jıynda Ulttyq ǵylym akademııasynyń prezıdenti Aqylbek Kúrishbaev Ulttyq akademııanyń jańa músheleri eń ózekti suraqtarǵa jaýap taýyp, ǵylymdy qoǵamnyń áleýmettik-ekonomıkalyq damýynyń qozǵaýshy kúshine aınaldyrady degen senim bildirdi.
«Memleket basshysy akademııa múshelerin saılaý barynsha ashyq jáne ádil ótýi kerektigin, onyń prosedýralary týraly qoǵam habardar bolýy tıis ekenin erekshe atap ótti. Osy talapty oryndaý maqsatynda akademııa múshelerin saılaýdyń jańa erejeleri ázirlendi, oǵan sáıkes irikteý prosedýrasy 3 kezeńnen turady. Bul belgilengen krıterıılerge sáıkes kelý, Ulttyq akademııa Prezıdıýmynda óz baǵdarlamasyn qorǵaý jáne akademııa músheleriniń jalpy jınalysynda daýys berý arqyly saılaný kezeńderinen turady. Sonymen qatar, akademııa músheleri memlekettik qyzmetkerler, kásipkerler ıaǵnı ǵylymı-zertteý qyzmetimen aınalyspaıtyn tulǵalar bola almaıdy.
Búgingi tańda Ulttyq akademııa múshelerin saılaýdyń negizgi erejeleri osyndaı, jáne biz olardy qatań saqtaımyz. Búgin biz sizderge jańadan saılanǵan akademıkterdi tanystyramyz. Olar – qazaqstandyq ǵylymnyń damýyna eleýli úles qosqan qoǵamǵa tanymal ǵalymdar. Qazirgi kezde akademııa ǵylymı-zertteý jumystarymen belsene aınalysatyn jetekshi ǵalymdardyń arqasynda, quramy únemi jańaryp otyratyn joǵary ǵylymı uıymǵa aınaldy. Ǵylymı qyzmetti uıymdastyrýdaǵy bar olqylyqtardy anyqtaý jáne toltyrý, júıeli jáne boljamdy taldaý negizinde ǵylymı zertteýlerdiń basymdyqtaryn anyqtaý, sondaı-aq forsaıttyq zertteýler, strategııalyq mańyzdy ıntegrasııalanǵan pánaralyq ǵylymı-tehnıkalyq baǵdarlamalardy ázirleý, memlekettik saıasatty ǵylymı-saraptamalyq qoldaý maqsatynda Qazaqstannyń jetekshi ǵalymdaryn biriktiretin negizgi mıssııany oryndaýǵa baǵyttalǵan Ulttyq akademııanyń jańa qurylymy quryldy.
Bıyl akademııa janynan qurylǵan taldaý ortalyǵy otandyq ǵylymnyń jaı-kúıin taldap, eldiń ǵylymı áleýetiniń derekqoryn jasady. Halyqaralyq yntymaqtastyqty damytý sheńberinde álemniń jetekshi ǵylymı uıymdarymen 27 memorandýmǵa qol qoıyldy. Olardyń negizinde nemis, koreı jáne qytaı ǵylymı qurylymdarymen birlesken 3 halyqaralyq ǵylymı ortalyq ashyldy, sondaı-aq AQSh jáne Qytaı ǵylym akademııalarymen 3 halyqaralyq ǵylymı jobany iske asyrý bastaldy», dep atap ótti dedi UǴA prezıdenti.
Búgingi kúni UǴA quramynda 17 akademık bar. Prezıdent janyndaǵy Ulttyq ǵylym akademııasynyń akademıkterin saılaý qaǵıdalaryna sáıkes, qatań irikteýden ótip, saılanǵan akademıkterge arnaıy dıplom tabys etildi.
«О́mir jáne densaýlyq týraly» ǵylymdar bólimshesi boıynsha:
Iýrıı Pıa, medısına ǵylymdarynyń doktory, qaýymdastyrylǵan professor, «University Medical Center» KQ basqarma tóraǵasy
Dılıara Qaıdarova, medısına ǵylymdarynyń doktory, professor, «Qazaq onkologııasy men radıologııasy ǵylymı zertteý ınstıtýty» AQ basqarma tóraǵasy
«Jer, ǵarysh jáne kommýnıkasııalar týraly» ǵylymdar bólimshesi boıynsha:
Erlan Batyrbekov, fızıka-matematıka ǵylymdarynyń doktory, professor, Ulttyq ıadrolyq ortalyqtyń bas dırektory
Baǵdat Teltaev, tehnıka ǵylymdarynyń doktory, professor, О́.Joldasbekov atyndaǵy Mehanıka jáne mashınataný ınstıtýtynyń bas ǵylymı qyzmetkeri
Jumabaı Bakenov, tehnıka ǵylymdarynyń doktory (TokyoTesh), PhD, professor, «National Laboratory Astana» energetıka jáne jańa materıaldar ǵylymy ortalyǵynyń basshysy
Aıdarhan Qaltaev, fızıka-matematıka ǵylymdarynyń doktory, professor, Q. Sátbaev atyndaǵy QazUTZÝ ınjenerlik mehanıka jáne modeldeý ǵylymı zertteý zerthanasynyń meńgerýshisi
«Agrobıoresýrstar jáne ekologııa týraly» ǵylymdar bólimshesi boıynsha:
Muhıt Orynbaev, veterınarııa ǵylymdarynyń kandıdaty, professor, «Bıologııalyq qaýipsizdik problemalary boıynsha ǵylymı-zertteý ınstıtýty» JShS «Juqpaly aýrýlardy baqylaý» zerthanasynyń bas ǵylymı qyzmetkeri
«Bilim men qoǵamdy damytý týraly» ǵylymdar bólimshesi boıynsha:
Jáken Taımaǵambetov, tarıh ǵylymdarynyń doktory, Ulttyq mýzeıdiń bas ǵylymı qyzmetkeri
Alqaly jıyn barysynda Q.Sátbaev atyndaǵy mereıtoılyq tósbelgisimen ǵylymdy nasıhattaýǵa belsendi úles qosyp júrgen buqaralyq kommýnıkasııa ókilderi marapattaldy. Olardyń qatarynda «Qazaq gazetteri» seriktestigine qarasty «Egemen Qazaqstan» gazetiniń tilshisi Elvıra Bókenbaeva, «Kazahstanskaıa pravda» gazetiniń tilshileri Nıkolaı Jorov, Aıgúl Turysbekova, «Aqıqat» qoǵamdyq-saıası jýrnaly bas redaktorynyń orynbasary Dına Imambaı bar.
Jıynǵa qatysýshylar ulttyq ǵylymnyń bastaýynda turǵan ǵalymdar shyǵarmashylyǵynan syr shertetin buıymdar jáne Ortalyq ǵylymı kitaphana qorynan usynylǵan sırek qordaǵy jádigerler kórmesimen tanysty.
ALMATY
