Foto: Erlan Omar
Týrıstik qyzmet kórsetý, qaladaǵy keńse jáne klıenttik baza boıynsha tájirıbesi bar Qaraǵandy turǵyny JShS quryp, ony basqarǵan.
Klıenttermen týrıstik qyzmet kórsetýge shart jasasyp, jaqyn jáne alys shetelderge saparǵa shyǵýǵa joldama satqan.
Osylaısha, jábirlenýshilermen jasalǵan sharttar boıynsha JShS dırektory olardyń 24 mln teńgeden astam aqshasyn jymqyrǵan.
«2023 jyldyń 4-10 tamyzy aralyǵynda otbasymen Túrkııaǵa demalýǵa ushýǵa sheshim qabyldaǵan Astana turǵyny JShS shotyna 2,5 mln teńge aýdaryp, 5 adamǵa joldama alǵan. Aqyry reısteri tirkelmegenin jáne brondalmaǵanyn bilgen ol Qaraǵandyǵa baryp, JShS dırektorymen kezdesken. Dırektor aqshany qaıtarýǵa ýáde bergen, biraq tek 380 myń teńgesin qaıtarǵan. JShS-den onyń paıdasyna 2,2 mln teńge óndirý týraly bekitilgen medıasııalyq kelisimge qaramastan, oǵan qatysty azamattyq talap qoıýdy tolyq kólemde qanaǵattandyrýdy talap etken. Sottalýshynyń alaıaqtyq boıynsha kinási qylmystyq is materıaldarymen, jábirlenýshilerdiń, kýálardyń aıǵaqtarymen, aqsha aýdarylǵany týraly málimettermen, týroperatorlardyń jaýaptarymen dáleldendi», delingen habarlamada.
Prokýror sottalýshyny 6 jylǵa bas bostandyǵynan, 5 jylǵa belgili bir qyzmetpen aınalysý quqyǵynan aıyrýdy suraǵan. Al jábirlenýshiler qatań jaza qoldanýdy talap etken.
Sottalýshy kinásin moıyndamaı, ózin aqtaýdy suraǵan.
Qylmystyq kodekstiń 190-babynyń 3-bóliginiń sanksııasynda múlki tárkilenip, belgili bir laýazymdy atqarý nemese belgili bir qyzmetpen aınalysý quqyǵynan 6 jylǵa deıingi merzimge aıyra otyryp nemese onsyz 3 jyldan 7 jylǵa deıin shekteý nemese bas bostandyǵynan aıyrý jazasy qarastyrylǵan.
Qaraǵandy qalasy, Qazybek bı aýdandyq soty alaıaqtyq jasady dep aıyptalǵan sottalýshyǵa qatysty qylmystyq isti qarap (QK-niń 190-babynyń 3-bóligi, 3,4-tarmaqtary), asyraýynda qart ata-anasynyń bolýyn jáne buryn sottylyǵynyń joqtyǵyn moıyndady, aýyrlatatyn mán-jaılar anyqtalmaǵan.
«Sottalýshy 4 jyl 6 aıǵa bas bostandyǵynan, 3 jylǵa týrıstik qyzmetpen aınalysý quqyǵynan aıyryldy. Jábirlenýshilerdiń azamattyq talap qoıýlary qanaǵattandyryldy», delingen habarlamada.
Sottyń úkimi zańdy kúshine engen joq.
