Teatrdyń jetekshi solısteri, Qazaqstannyń eńbek sińirgen qaıratkerleri – Aıgerim Beketaeva, Baqtııar Adamjan, Erkin Rahmatýllaev, sondaı-aq halyqaralyq baıqaýlardyń laýreattary, solıster Shuǵyla Ádephan, Sofııa Ádilhanova, Dıas Qurmanǵazy jáne kordebalet ártisteri Dýbaı tórinde alty kún boıy qysqy ǵajaıyptardyń ǵalamat atmosferasyn syılady.
Teatr tarıhyna úńilsek, «Shelkýnchık» baleti álemniń kóptegen teatrynda túrli qoltańbada qoıylǵan. Al onyń tól nusqada saraptalǵan jańashyl qoıylymyndaǵy elordalyq trýppanyń joǵary oryndaýshylyq deńgeıi «Dýbaı Opera» ujymynyń da aıryqsha nazaryn aýdardy.
«Astana Opera» álemde ǵana emes, osynda, Dýbaıda da tanymal ári óreli ónerimen bizdiń elimiz úshin de syıly. О́tken maýsym zor jetistikpen este qaldy, trýppanyń sondaǵy jarqyn óner kórsetýinen keıin aıtýly ujymdy qaıta shaqyrýdy uıǵardyq. Bul joly da bıletter tolyǵymen satylyp, bıylǵy tabysymyz biz oılaǵannan da asyp tústi. Bul «Astana Operany» alǵash kórýdi qalaǵan nemese ony burynnan jaqsy kóretin Dýbaı jurtshylyǵynyń osy ujymmen kezdesýdi taǵatsyzdana kútkenin dáleldeıdi. Trýppanyń quramynda teatrǵa aıryqsha energııa ústeıtin jas daryndardy kórý kóńilge erekshe qýanysh uıalatady. «Astana Opera» – oryndaýshylyq óner álemine qatysy bar barlyq janǵa shabyt beretin joǵary kórkemdik sheberliktiń jarqyn úlgisi», dep atap ótti «Dýbaı Opera» teatrynyń dırektory Paolo Petrochellı.
Dýbaıdaǵy alty óner kórsetýdiń árqaısysy kórermenderdiń dý qol shapalaǵy men tańdanysyna ulasty. Balet trýppasy joǵary sheberlik deńgeıin pash etip, otandyq ártisterdiń óneri qala turǵyndary men qonaqtaryna umytylmas áser qaldyrdy. Zalda otyrǵan qalyń kórermen de qoıylymnan keıin óz áserin qýana bólisip jatty. Sonyń biri – AQSh azamaty Zeıdan Saleı.
«Ártisterdiń barlyǵy shynymen de tamasha jumys atqardy. Bul tańǵalarlyq atmosferalyq mýzykamen súıemeldengen úzdik ári jigerli balet boldy. «Dýbaı Operaǵa» alǵash ret kelip otyrmyn, osyǵan deıin AQSh pen Eýropadaǵy opera teatrlarynda bolsam da, mundaı ǵajaıypty esh jerden kórmeppin. Bul – buryn-sońdy tamashalaǵan spektaklderimniń ishindegi eń úzdigi. «Astana Opera» trýppasynyń óner kórsetýi sanama úlken silkinis ákeldi desem, artyq aıtpaǵanym. Barlyǵy 10 bılet satyp alyp, munda otbasymmen jáne dostarymmen keldim, búgingi kesh soǵan turarlyqtaı boldy. Ádemi qoıylym tamashalap, keremet ýaqyt ótkizdik. Ásirese zaldaǵy jahandyq atmosferaǵa tańǵaldym: munda álemniń ár qıyrynan kórermender – amerıkalyqtar, orystar, arabtar, úndister, Ońtústik Shyǵys Azııa, Qytaı, Japonııa turǵyndary jınalypty. Osy rette mýzykanttardy da atap ótkim keledi, olar tańǵalarlyq dáldikpen jáne senimdilikpen oınady. Ártisterdiń óner kórsetýi jarqyn ári áserli boldy. Bul kesh kópke deıin esimde qalary sózsiz» dep qoıylymnan alǵan áserin irkimedi.
Dýbaıǵa Meksıkadan kelgen kórermen Artýro Peres Rıvera da onyń sózimen kelisti. – Keremet óner kórsetýge kýá boldym. Osynaý spektakldiń aýqymdylyǵyna tántimin. Dýbaıǵa Mehıkodan arnaıy ushyp kelip, «Shelkýnchıkti» asyǵa kútken edim. Opera teatrynyń sahnasynan sáni men saltanaty kelisken kostıým, dekorasııalar hám kórse kóz toıǵysyz ásem boıaýlardy kóre alǵanyma qatty qýanyshtymyn. Shynymen de joǵary deńgeıdegi trýppanyń óner kórsetýine kýá boldyq, dedi Artýro Peres Rıvera.
Al maestro Djýzeppe Akýavıvanyń sózinshe, bul ǵajaıyp gastroldik keshterde «Dýbaı Opera» shaǵyn jer sharyn eske salyp, onda barlyq el men ult ókilderi jınalǵandaı áser
etipti.
– Mádenıet – adamdar men elder arasynda kópir salýǵa keremet múmkindik. Men ózimniń barlyq mansabymdy osy baılanystardy qurýǵa jáne damytýǵa arnadym, degen «Astana Opera» Sımfonııalyq orkestriniń dırıjeri Djýzeppe Akýavıva sózin ári qaraı jalǵady: – Biz munda osymen ekinshi ret óner kórsetip otyrmyz. Álbette, bul – keremet tájirıbe. Byltyr bes spektakl ótkizip, onyń bárinde anshlag bolǵan edi. Bıylǵy usynǵan alty qoıylymymyz da lyq toly zal jınady. Kórermenderdiń júreginen oryn alǵan jumysymyzdy maqtan etemin. «Astana Operanyń» keremet orkestrine dırıjerlik etip, osyndaı bedeldi sahnada óner kórsetken kezimde men árdaıym zor qýanysh pen tolqynysty sezinemin, dep atap ótti maestro Djýzeppe Akýavıva.
Mádenıet jáne aqparat mınıstrliginiń qoldaýymen júzege asyrylǵan «Astana Opera» teatrynyń shyǵarmashylyq ómirindegi mańyzdy gastrol otandyq balet mektebiniń joǵary kásibıligin halyqaralyq arenada, álemniń mádenı jáne ekonomıkalyq ortalyǵy Dýbaıda osylaısha zor abyroı, teńdessiz dańq bıiginde pash etip qaıtty.
