«Mýfasa: Arystan patsha» fılminde Rafıkı Sımba men Nalanyń qyzy Kıaraǵa Praıd jerleriniń súıikti patshasynyń hıkaıasy men patsha ataný jolynda basynan keshken qıyndyqtary týraly baıandaıdy. Adasyp, jetim qalǵan Mýfasa patsha otbasynan shyqqan Taka esimdi muragerdi kezdestiredi. Taka oǵan jany ashyp, qoldaý kórsetedi. Ekeýi taǵdyr ózgerter saıahatqa attanyp, dushpandarymen betpe-bet kezdesedi. Olardyń dostyǵy da synǵa túsedi. Sondaı-aq kórermen Tımon, Pýmbamen qaıta qaýyshady.
Shytyrman oqıǵaǵa qurylǵan fılmniń shynaıy qabyldanýy dýblıaj qyzmetimen tikeleı baılynysty ekeni belgili. Erasyl Muhamadıev – Mýfasa, Baqtııar Baıserik – Pýmba, Dýlyǵa Aqmolda – Rafıkı, Asan Májit – Kırosty keıiptep, bas keıipkerlerdi qazaq tilinde dybystady. Al qazaq tilindegi vokaldy partııalar Abik Jeksen – Mýfasa, Dınara Sultan – Sarabı, Jaman T (Taır Sahıev) – Jas Rafıkı, Ace – Zazýdyń daýsymen shyrqaldy. Takanyń sózi men ánderin qazaq tilindegi dýblıajdyń rejısseri Shah-Murat Ordabaev oryndady. Anımasııanyń mýzykalyq jetekshisi – Ánel Sirgebaeva.
– Qazaq tiline aýdarylyp jatqan fılmderdi barynsha keńinen nasıhattap, qazaq dýblıajyn qoldaýǵa shaqyrýdy jalǵastyra beremiz. Álemdik stýdııalardyń qazaqtildi ortanyń qyzyǵýshylyǵy men naryqqa yqpalyn eskerip, úzdik týyndylaryn óz esebinen aýdaryp, usynýy – biz úshin óte mańyzdy bastama. Bıylǵy álemdik premeralardyń qazaq tilindegi aýdarmasy buryn-sońdy bolmaǵan rekordtyq kórsetkishterge jetti. «Moana 2» fılminiń qazaqsha nusqasy buǵan deıingi qazaq tilindegi barlyq anımasııalyq fılmniń rekordtaryn jańartty. Bul – qazaqsha kıno qaraýǵa yqylasty qaýym kóbeıgeniniń belgisi. Aldaǵy ýaqytta tanymal týyndylardy qazaq tiline aýdarý jalǵasa beredi. Bul tilimizdiń tartymdylyǵyn arttyrýǵa jáne keńinen taratýǵa baǵyttalǵan tıimdi tásil dep sanaımyn, – deıdi Halyqaralyq «Qazaq tili» qoǵamynyń prezıdenti Raýan Kenjehanuly.
Buǵan deıin «Moana 2-niń» qazaqsha nusqasy boks-ofısterdiń 12,36% úlesin qamtydy. Kassalyq tabys úlesi 12 kúnde 151 000 000 teńgeden asyp, qazaqshaǵa aýdarylǵan anımasııalyq fılmder arasynda eń tabysty týyndy retinde rekord ornatty. Bıyl maýsym aıynda Disney men Pixar stýdııasynyń «Oıjumbaq 2» fılmi alǵashqy 4 kúnde 40 000 000 teńgeden astam qarajat jınap, buǵan deıin kórsetilgen týyndylar arasynda rekord ornatqan edi.
ALMATY
