Dramaǵa áleýmetke ortaq problema, qoǵamnyń derti – nashaqorlyq taqyryby arqaý bolǵan. Iá, taǵdyr tálkegine túsý áp-sátte eken. Ǵasyrymyzdyń búgingi derti – nashaqorlyq, adamzat tarıhyndaǵy qasiretterdi kóbeıtýshi, zulymdyqtardy týdyrýshy apıyn ekenin bilse de, oń-solyn tanı almaǵan jas óskin nege adasty? Durysy, ony adastyrǵan kim? О́mirin tas-talqan etken jaýyzdardyń jazasyn kim beredi? Kinálini kim tabady? «S.O.S.» dramasy dál osy suraqtarǵa teatr tilinde jaýap izdeýge umtyldy.
«Qoıylymda bir otbasynyń basynan ótken jaǵdaı baıandalady. Basty róldegi keıipker Aıbar jumys taba almaı, qınalyp júrgen shaǵynda esirtki satatyn jigitterge jolyǵyp, jeńil aqshanyń sońynan ketedi. Sońynda uıyp otyrǵan bir otbasynyń shańyraǵy ortasyna túsedi. Jalpy, mundaı taqyryp qazirgi qoǵamda, ásirese, jasóspirimder úshin óte ózekti dep oılaımyn. Jeńil aqsha adamǵa eshqashan abyroı ápermeıdi. Onyń sońy, tipti, taǵdyrlardy óshpeıtin ókinish, adasýǵa ákelip, jas ǵumyryn óksitýi múmkin. Búgingi kórermenderimizdiń kópshiligi jastar eken. Spektaklimiz arqyly qolymyzdan kelgenshe solardyń sanasyna sál de bolsyn sáýle shashyp, oı sala alsaq – maqsatymyzdyń oryndalǵany», deıdi rejısserdiń ózi.
Kostıým sýretshisi Aıdana Eńgebaı, jaryq qoıý sýretshisi Ermek Muhtaruly, dybys rejısseri Asyljan Asqarov kórkemdik deńgeıine ter tókken qoıylymda bas keıipker Aıbar rólin qos quramda Bıbol Baıǵaraev pen Abzal Arapov oınasa, Aıbarshany Arýjan Baǵzat pen Arelana Amangeldıeva keıiptedi. Ana rólin «Qurmet» ordeniniń ıegeri Maıra Omar men Aqnıet Zamzat, Dıanany Mereıim Talǵat pen Narqyz Januzaqova oryndady.
«Búgingi spektaklde maǵan Aıbarsha róli berildi. Ol – basty keıipker Aıbardyń qaryndasy. Aıbarsha aǵasynyń jasaǵan qateligin jýyp-shaıý úshin esirtki qabyldaýǵa májbúr bolady. Jalpy, bizdiń baǵyt Mýzykalyq jas kórermen teatry bolǵandyqtan, qoıylymdarymyzdy tamashalaýǵa kóbinese mektep oqýshylary men stýdentter keledi. Sondyqtan jastar arasyndaǵy lýdomanııa, esirtkige qarsy qoıylǵan aıtýly dramada zııandy ádetterdiń zardabyn barynsha jan-jaqty qyrynan ashyp kórsetýge tyrystyq», dedi aktrısa Arýjan Baǵzat.
Premeraǵa Astana qalasy Mádenıet basqarmasynyń basshysy Jańabaı Meıirmanqulov, Mýzykalyq jas kórermen teatrynyń dırektory, Qazaqstannyń eńbek sińirgen qaıratkeri Ashat Maemırov, kompozıtor, prodıýser Rınat Gaısın, sondaı-aq mektep oqýshylary jáne stýdentter qatysty.
Qoıylym sońynda spektaklden áserlenip shyqqan jas kórermenderdi sózge tartqan edik, kóp ishinen sýyrylyp shyqqan mektep oqýshysy Qaldybaı Nurǵısa: «Maǵan premera úlken oı saldy. Qazirden bastap zııandy ádetterden aýlaq bolý kerek ekenin tereń uǵyndym. Qoıylymdy kóre otyryp, ákeniń, ananyń, jalpy adamzattyń qadirin túsindim», dedi tebirene ún qatyp.
Eki kún qatarynan qoıylǵan spektaklge kórermen kóp jınaldy. Jastar men jasóspirimderdiń taǵdyryna qashanda beıjaı qaramaıtyn teatr ujymy «S.O.S» qoıylymy arqyly taǵdyr tálkegine túsý áp-sátte, adamzat tarıhyndaǵy qasiretterdi kóbeıtýshi, zulymdyqtardy týdyrýshy, adamdy azdyrýshy apıyn ekendigin kórermenge nanymdy jetkize bildi.
