foto gov.kz
FIRST Global Challenge – jyl saıyn ártúrli elderde ótetin olımpıadalyq úlgidegi jahandyq robototehnıka chempıonaty. Bul chempıonatqa álemniń túkpir-túkpirinen 200-ge jýyq eldiń talantty jastary qatysady.
2022 jyly chempıonat Jenevada ótti. Jarys kómirqyshqyl gazymen kúres taqyrybyn qamtydy. Osy jarysta qazaqstandyq oqýshylar jeńiske jetti. Bizdiń oqýshylar 167 eldiń jasóspirimderimen synǵa túsip, eń kóp upaı jınady. Elimizdiń namysyn ulttyq qurama atynan 15 pen 17 jas aralyǵyndaǵy 5 oqýshy qorǵady. Oqýshylarymyz 3 kún ishinde 16 oıyn ótkizip, eshqaısysynan jeńilmeı, upaı sany boıynsha rekord ornatty. Chempıonattaǵy birinshi orynnan bólek, qazaqstandyq komanda basqa elderdiń komandalaryna kórsetken «Aıryqsha qoldaýy úshin» Al-Khwarizmi altyn medalin, sondaı-aq robotty jasaýdaǵy tamasha ınjenerlik sheshimderi úshin JUDGES AWARD arnaıy syılyǵyn jeńip aldy. Jeńis oqýshylarǵa álemniń jetekshi ýnıversıtetterine túsýge múmkindik berdi.
Al 2023 jyly Sıngapýrda ótken álem chempıonatyna Qazaqstan qurama komandasynda Almaty qalasyndaǵy FMB NZM oqýshylary Nurıslam Turǵynbaı, Nursultan Janzaqov, Sergeı Gaponov, Dámeli Shaımerdenova jáne Imanáli Kóksal boldy. Ulttyq quramanyń bapkerleri - Bekzat Ińkárov pen Nurdáýlet Dosmaǵambet qatysty.
«Biz Sıngapýrǵa Qazaqstannyń túkpir-túkpirinen 200 oqýshynyń ishinen ulttyq kezeńde iriktelgen myqty komandany alyp keldik. Bizdiń komandanyń aldynda ótken jylǵy Jenevadaǵy tarıhı jeńisti qaıtalaý mindeti turdy jáne olar muny oıdaǵydaı oryndady, upaı sany boıynsha álemdik rekord ornatty. Budan basqa, komandamyz halyqaralyq yntymaqtastyq úshin tóreshilerdiń marapattaryna ıe boldy, bul biz úshin úlken maqtanysh. Qazaqstandaǵy robototehnıka jyl saıyn halyqaralyq brendke aınalyp keledi», dep bólisti USTEM Foundation qoǵamdyq qorynyń jetekshisi Asylbek Myrzahmetov.
2024 jyly Gresııada ótken birinshi Global Challenge álem chempıonatynda qazaqstandyq qatysýshylar Grand Challenge Award nomınasııasynda altyn medaldy jeńip aldy. Sonymen qatar, Eınshteın atyndaǵy First Global International Excellence; Erekshe ınjenerlik ázirlemeleri úshin Robots Skills Challenge kúmis júldesine ıe boldy. Komanda quramyna Almatydaǵy fızıka-matematıka mektebi, Nazarbaev zııatkerlik mektebi oqýshylary: Dosjan Daıran, Erdáýlet Týrgenbaev, Álfııa Baıjaqyp, Nurjan Kókeev jáne Qadylbek Dastan engen.
Bul jetistik olardyń qajyrly eńbegin ǵana emes, sonymen birge olardyń eldegi alǵan joǵary bilim men qoldaýyn kórsetedi. Mektep oqýshylarynyń jeńisi qazaqstandyqtardyń óskeleń urpaǵy úshin ǵylym men tehnıkada jańa bıikterge umtylýda úlgi bolmaq.
«Taǵy da jarys rekordyn jańartyp, altyn medal jeńip alǵanymyzǵa qýanyshtymyz. Álemde birde-bir el eki dúrkin chempıon bolmaǵan. Biz úshinshi jyl qatarynan jeńiske jetip jatyrmyz. Ulttyq quramanyń quramy osy jyldar ishinde birde-bir ret qaıtalanbady. Iаǵnı el namysyn úsh jylda úsh túrli komanda qorǵaǵanyn atap ótkimiz keledi», dedi ulttyq quramanyń jattyqtyrýshysy Asylbek Myrzahmetov.
Jattyqtyrýshynyń aıtýynsha elimizdiń quramasy 40-tan astam komandanyń arasynda ulttyq irikteýden ótken. Balalar álemdik kezeńge 1,5 aı boıy daıyndalyp, kún saıyn robottyń jumysyn jetildirip otyrǵan. Olımpıadada komanda azyq-túlik máselesin sheshýge baǵyttalǵan jobany usynǵan. Robot ártúrli tústi sharlar túrinde sý men energııanyń ımıtasııasyn júzege asyrdy. Oqýshylar olardy arnaıy ındıkatorlary bar konteınerge aparatyn jáne jınaıtyn robotqa berip otyrǵan.
Elimizde robototehnıkany meńgergen jastardyń kóbeıip kele jatqany qýantarlyq jaǵdaı. Búginde bul tehnologııagny damytý eldiń ınnovasııalary men ekonomıkalyq damýy úshin úlken múmkindik usynady. Robototehnıkany damytýǵa ýnıversıtetterdiń, ǵylymı ortalyqtardyń jáne jas kásipkerlerdiń belsendi qatysýy, sondaı-aq memlekettik qoldaý jáne halyqaralyq áriptesterdi tartý salanyń odan ári ósýine yqpal etedi.
