Sebebi ol rejısser Ádilhan Erjanovpen tandemde túsirgen «Qojaıyndar» fılmindegi alǵashqy operatorlyq jumysymen álemniń eń iri kınofestıvalderiniń biri – «Kannǵa» joldama aldy. Kıno keńistigindegi asa bedeldi marapat «Azııanyń Oskary» atalymyndaǵy júldege ıe boldy. Kıno álemindegi odan keıingi irili-usaqty jeńisterine tipti san jetpeıdi. Endi, mine, bıyl ol túsirgen «Dala qasqyry» fılmi «Fantasia Film Festival» atty kınofestıvalde joǵary baǵalanyp, Amerıka kıno óneri jáne ǵylym akademııasyna múshelikke qabyldandy. Atalǵan akademııanyń múshesi bolǵan Erkinbek Pitirálıev endi uıym jyl saıyn tabystaıtyn «Oskar» syılyǵynyń laýreattaryna daýys bere alady. Bul týraly taspagerdiń ózi de áleýmettik jelidegi paraqshasyna jazyp, kórermeninen súıinshi surady.
«Bul – men úshin úlken qurmet jáne kıno álemine qosqan úlesimdi moıyndaý. Kınoındýstrııanyń eń úzdik ókilderin biriktiretin osyndaı bedeldi uıymnyń bir bóligi bolýdyń keremet múmkindigi týǵanyna rızamyn. Kıno óneriniń bolashaǵyn qalyptastyratyn mańyzdy sheshimder men daýys berýge qatysýdy asyǵa kútemin. Osy jolda maǵan qoldaý kórsetip, sengenderdiń barlyǵyna rahmet», dep jazdy kınooperator jelidegi paraqshasynda.
Iá, otandyq kınooperatordyń izdeniske toly jumysyn kıno mamandary «Jaryq pen kóleńkeni utymdy oınata alýymen erekshelenedi» dep joǵary baǵalaıdy. Al jaryqty kóre bilý, tústi seziný – sýretshi, operator mamandar úshin úlken qasıet. Kóptiń bárine buıyra bermeıtin biregeı qabiletti boıyna darytqan taspager ár jumysymen jańa beleske shyǵyp, izdenisimen ulttyq kınematografııada irgeli iz qaldyryp keledi. Áıgili «Oskar» syılyǵyna úmitkerler úzdigin tańdaýǵa atsalysý quqyǵyna ıe bolýynyń ózi – qazaq operatorynyń shyn máninde myqtylyǵyn moıyndatsa kerek.
