Keler jyly án atasy – Ámireniń Parıjde án shyrqap, kúlli fransýz halqyn únimen uıytqan tarıhı sátke ǵasyr tolady. Ataýly dataǵa oraı erterek qamdanǵan elordalyq teatr ujymy áni men sáni, máni men mazmuny kelisken kórkemdik deńgeıi joǵary úzdik týyndyny ómirge ákelipti. Basty ári negizgi róldi aıtýly teatrdyń talantty akteri Orazaly Igilik óz deńgeıinde kemeline keltire oınap shyqty.
Jalpy, monospektakl – qoıylym túrleriniń ishindegi eń aýyry hám qıyny. Kezindegi kásibı teatr negizin qalaǵan Qalıbek Qýanyshbaev, Elýbaı О́mirzaqov, Serke Qojamqulov syndy sańlaqtar salǵan sahnadaǵy sara jol sonyń aıǵaǵy bolsa kerek. Demek, monospektaklge bara alatyn akterdiń de sheberlik hám shyǵarmashylyq qýaty myqty bolǵany abzal. Olaı bolmaǵan jaǵdaıda, monospektaklińiz de óz dittegenine jetpeı jyǵylady. Bul turǵydan kelgende, Ámire rólin oınaıtyn akterge rejısser tańdaýy dóp túsken. Áni de, sáni de, úni de, uǵymy da bir boıynda utymdy úılesken talantty ártis, shyn máninde, kórermenin Ámire álemine jaqyndatqandaı boldy.
Ras, buǵan deıin kıno tilinde de, sahna tórinde de túrli Ámireler qoıylyp keldi ǵoı. Biraq keıde sol qoıylymdardan Ámireni taba almaı jıi pushaıman kúı keshetinimiz umytyla qoıǵan joq. Sebebi birde rejısser ańyz ánshiniń tilin qazaqshaǵa shorqaq, kórkin kún qaqpaǵan tym jyltyraq asfalt balasy dep kórse, keleside bas keıipker ekinshi orynǵa syrǵyp, basty planǵa 1925 jylǵy Parıjdegi jármeńke atmosferasy shyǵyp ketip, kóńil kúmiljıtin. Al tipti, endi birinde án sala almaıtyn akterler sahnada Ámire bolyp júrgenin kórip kóńil qalǵan tustar da jıi ushyrasty shyǵarmashylyq tájirıbemizde. Al bul Ámireni birden qabyldaýymyzdyń syry – qazaqtyń ıen dalasynda ósken qara balanyń rýhy, shyńyltyr úni basty róldi somdaǵan akter Orazaly Igiliktiń boıynan tabyldy, onysy monospektakl tabıǵatynda sátti ashyldy. Keskindeıtin beınesin, keıipkerin ishine sińirgeni sonshalyq, akterdiń Ámire rýhymen biteqaınasyp ketkendeı áser qaldyrdy.
Shyǵarmashylyq toptyń osy eńbegin joǵary baǵalaǵan «Teatr synshylary birlestigi» Astana qalasy ákimdigi Mýzykalyq jas kórermen teatrynyń «Ámire» qoıylymyn «Jyldyń úzdik monospektakli» dep tanydy.
