Qysqa ǵumyrdyń keıbir sátteri kóz aldyńa kelip tura qalady eken. Jańa ǵana Almatydan sýyq habar jetti. Belgili qoǵam qaıratkeri, kósemsózshi, telejýrnalıst Meırambek Tólepbergen baqıǵa kóshipti... Jany jaısań, qalamy qarymdy, naǵyz ultjandy azamat edi.
Ol qasıetti Áýlıeata óńirinde dúnıege keldi. О́lke tarıhy týraly tolǵandy. 8 tańdaýly eńbektiń avtory. Meırambek Tólepbergendi qazaqtyń uly tulǵasy Sheraǵa – Sherhan Murtaza arqyly tanýshy edim.
1986 jyly Jeltoqsan kóterilisi kezinde ol Almaty oblystyq «Jetisý» gazetinde qyzmet isteıtin. Men ataqty «Lenınshil jas» gazetiniń bas redaktory edim. Qabyldaýyma Meırambek keldi. О́ńi sup-sur. Gazette sot úderisindegi Qaırat Rysqulbekovtiń qasqaıyp turǵan sýreti jarııalanypty. Gazettiń bas redaktory, KazTAG-tyń dırektory jumystan bosatylǵan.
Gazettiń sol kúngi nómirine kezekshilik jasaǵan Meırambektiń de jumystan bosaý qaýpi týypty. Úı alý kezegi jaqyndap turǵan eken. Jumystan shyqsa, bárinen aıyrylady.
Qalamger inimdi sol kúnderdiń qaharyna qaramastan «Lenınshil jasqa» qyzmetke aýystyryp aldym. Keıin úıin alyp, gazette bólim meńgerýshisi boldy.
«Egemen Qazaqstan» gazetine bas redaktor bolyp kelgenimde ol osy basylymda jumys isteıdi eken. Qazaqstan tarıhyn jazýǵa nıet ettik. Sol jumysty úılestirýdi Meırambek inime tapsyrdym. Ataqty Mámbet Qoıgeldi, Talas Omarbek, Kamal Burqanov, Bereket Káribaev, Búrkitbaı Aıaǵan syndy tarıhshy ǵalymdar bir jarym jyl boıy gazetke ǵylymı zertteý maqalalar jarııalady. Ol kezeńde Reseı tarapynan «Qazaq memlekettiligi bolǵan joq» degen pikirler aıtyla bastaǵan. Bul bizdiń osyndaı jańsaq pikirge bergen tosqaýyl jaýabymyz bolatyn.
Jaqsy jýrnalıst jańalyqty izdep júredi. Keńes Odaǵynyń batyry Baqtyoraz Beısekbaev týraly Reseıdiń «Izvestııa» gazetinde kishkentaı aqparat jarııalandy. Qazaqtyń ultjandy azamaty, baspager Muhtar Qul-Muhammed ekeýmiz telefon arqyly sóılestik. Ol issapar qarjysyn óz moınyna aldy. Meırambekti Belorýssııaǵa jiberdik. Ol «Qaharman Baqtyoraz» degen tamasha maqala jazdy. Osy arqyly ult batyryn respýblıka tanydy, Almaty oblysy Balqash aýdany ákimdiginiń sheshimimen Mınsk túbindegi Baqtyoraz batyrdyń beıitiniń basyna eskertkish qoıyldy. Respýblıkada kóshelerge aty berildi. Arqa tósindegi elordada da Baqtyoraz Beısekbaev kóshesi bar.
Jambyl oblysy ákiminiń ıdeologııa jónindegi orynbasary boldy.
Keıin «Qazaqstan» teleradıokorporasııasyna qarasty aımaqtyq «Jambyl» telearnasyn uzaq basqardy.
Parlament Májilisiniń depýtaty bolyp saılanyp, eldik zańnamalardyń qabyldanýyna belsene aralasty.
Ultqa qyzmet isteýdiń úlgisin kórsetken Meırambek Tólepbergenniń jatqan jeri jaıly, ımany salamat bolsyn.
Ýálıhan QALIJANOV,
UǴA akademıgi, Qazaqstannyń eńbek sińirgen qaıratkeri
