El tarıhynyń túgendelýine ózderiniń súbeli eńbekterin qosyp kele jatqan eki tarıhshymyzdyń bul jolǵy Shymkent qalasyna bet burýy da jaıdan-jaı emes eken. M. Áýezov atyndaǵy Ońtústik Qazaqstan ýnıversıteti kolledjine kelip, oqý ordasynyń oqytýshylarymen júzdesti.
Tarıh ǵylymy jaıynda tereńnen sóz qozǵap, rýhanı áńgimelerdiń tıegin aǵytqan Zııabek Qabyldınov mundaı kezdesýler kóbinese ýnıversıtetterde ótip, kolledjderde kóp bola bermeıtinin eskerip, arnaıy kelip turǵanyn da jasyrmady. Sonymen qatar bilikti mamandardyń da kóbiniń alǵashqy bilim nárin kolledjden alǵanyn da aıtty.
Bul kezdesýdegi kóńil qýantar jaǵdaıdyń biri – 1956–1982 jyldar aralyǵynda Sh.Ýálıhanov atyndaǵy Tarıh, arheologııa jáne etnografııa ınstıtýtynda tarıh ǵylymynyń jandaný jolynda 26 jyl eleýli eńbek etken Qazaq KSR Ǵylym akademııasynyń akademıgi jáne vıse-prezıdenti, Memlekettik syılyqtyń laýreaty, tarıh ǵylymdarynyń doktory, professor Aqaı Núsipbekovtiń 115 jyldyǵyna oraı daıyndalǵan V tomdyq eńbekter jınaǵynyń tusaýy kesildi. Almatydan kelgen qonaqtarymyz bul V tomdyqqa engen Aqaı Núsipbekovtiń eńbekteri jaıynda kolledj ujymyna tolyq tanystyryp, oqý ornyna syıǵa tartqandyǵy barsha oqytýshylar úshin bir mereıli kezdesý ekendigi anyq.
Áýezhan Shashaev kolledj ujymyna túsinikti bolýy úshin Aqaı Núsipbekovtiń ómirine keńinen toqtalyp, bul bes tomdyq eńbektiń daıyndalýy Sh.Ýálıhanov atyndaǵy Tarıh jáne etnologııa ınstıtýty ujymynyń túgeldeı jumylýymen istelgen sharýa ekenin jetkizdi. Sonymen qatar el úshin eńbek etken A.Núsipbekovteı eren tulǵany ulyqtaý aıtýly ınstıtýttyń dástúrli joly ekenin aıta kelip, 2019 jyly A.Núsipbekov atyndaǵy memorıaldy kabınet ashylǵandyǵyn, jyl ótken saıyn ǵalymnyń ǵylymı muralaryn jańa qyrynan zertteý jumystary men konferensııalar jıi bolyp turatynyn baıandady.
Kezdesýde kolledj ujymyn taǵy bir serpiltken – Zııabek Qabyldınovtyń quttyqtaý sózi boldy. Iаǵnı Sh.Ýálıhanov atyndaǵy Tarıh jáne etnologııa ınstıtýty barlyq oblyspen, óńirmen tyǵyz baılanysta bola otyryp, ásirese el tarıhynyń tolyqtanýyna, jandanýyna júıeli jumys jasaý úshin ár oblystardan ınstıtýttyń ókildikterin saılaıtyndyǵyn uǵyndyrdy. Sondaı-aq Túrkistan oblysy, Shymkent qalasyndaǵy ókili retinde tarıh ǵylymdarynyń doktory, professor Seıdehan Álibek taǵaıyndalǵanyn habarlap, qolyna kýálik tabys etti.
Sóz sońynda búgingi kezdesýdi qoryta otyryp, ári ózine júktelgen mindetti oıdaǵydaı atqaratynyna senimdilik bildirgen kolledj basshysy Seıdehan Álibek «Tarıhyn bilmegen el – tamyrsyz aǵash sekildi» degen naqyl sózdiń tegin aıtylmaǵanyn, sondyqtan da ár salanyń, ár adamnyń bolsyn, báriniń de tarıhqa qatysy bar ekenin tilge tıek etti. El tarıhyn jınaqtaý jolynda barlyǵymyzdyń, ásirese tarıhshy mamandardyń jemisti jumys isteýi kerek ekenin, ózi basqaryp otyrǵan kolledj ujymynyń budan keıin irgeli ınstıtýtpen jaqyn baılanysta bolyp, júıeli jumys júrgizetinin jetkizdi.
Nurlybek Dosybaı,
M.Áýezov atyndaǵy OQÝ kolledjiniń aǵa oqytýshysy
