Foto: Ashyq derekkóz
Mınıstrdiń aıtýynsha, qazirgi kúni jan basyna shaqqandaǵy normatıvtik qarjylandyrýdyń qoldanystaǵy ádistemesine sáıkes 1 stýdentti oqytýǵa bólinetin qarajattyń ortasha mólsheri 437 myń teńgeni qurasa, endi ol orta eseppen 912 myń teńgeni quraıtyn bolady.
«Jańa qarjylandyrý normatıvi negizgi jáne yntalandyrý bólikterinen turady, bul rette yntalandyrýshy tólemder naqty kórsetkishterge qol jetkizgen kolledjderge beriledi. Qarjylandyrýdyń jańa júıesi básekege qabiletti mamandar daıarlaýǵa, bilim berý uıymdaryn zamanaýı materıal-tehnıkalyq quraldarmen jabdyqtaýǵa jáne pedagogterdiń biliktiligin arttyrý kýrstaryn uıymdastyrýǵa múmkindik beredi», dedi Ǵanı Beısembaev.
Sonymen qatar bıyl tehnıkalyq jáne kásiptik bilim berý júıesin damytý úshin bıznes-qurylymdar men ınvestorlardy tartý josparlanǵan.
Mınıstr bul dýaldy oqytý júıesin damytýǵa jáne kásiporyndardyń tapsyrysy negizinde ekonomıkaǵa qajetti mamandardy maqsatty túrde daıarlaýǵa múmkindik beretinin atap ótti.
Aıta keteıik, búginde nebári 518 kásiporyn kolledjderge sheftik qamqorlyq kórsetip otyr. Aldaǵy ýaqytta kolledjdermen yntymaqtastyq ornatyp, olardyń qyzmetine qoldaý kórsetetin kásiporyndar sanyn 4000-ǵa jetkizý josparlanyp otyr.
«Bıyl kolledjder jumys berýshilermen birge 2 myńnan astam bilim berý baǵdarlamasyn ázirleıdi, 1,5 myń pedagog óndiris bazasynda taǵylymdamadan ótedi. Nátıjesinde bıznespen yntymaqtastyq jańa deńgeıge kóterilip, kolledjder naqty ekonomıka salalary úshin jumysshy maman daıarlaýdyń negizgi býynyna aınalady», dedi Ǵanı Beısembaev.
