Depýtat arnaıy maqsattaǵy mobıldi is-qımyl bóliminiń jumysymen tanysyp, oqý ortalyǵy men oqý-óndiristik zerthanany aralady. Ujymmen áskerı qyzmetshilerdi daıarlaý, «Qarasaı» О́B ınjenerlik-jelilik ınfraqurylymynyń qyzmetin talqylady.
Jıyn barysynda qazandyqty qaıta jańǵyrtý máselesin sheshý joldary, shekaralas aýmaqty sýmen qamtý jáne káriz júıesi máseleleri aıtyldy. Sondaı-aq áskerge shaqyrylǵandardyń qyzmetten oralǵan soń jumysqa ornalasý múmkindigi de sóz boldy.
– Memleket jasandy ıntellektini, tehnıkanyń sońǵy jetistikteri – sapaly jabdyqtardy, arnaıy datchıkterdi paıdalana otyryp, shekarada qaýipsizdikti qamtamasyz etýge tıis. Árıne, turmystyq máselelerdi de sheshý qajet. Shekarada sapaly jáne qaýipsiz qyzmet atqarý úshin barlyq jaǵdaı bolýy qajet, – dedi O.Quspekov.
Depýtat sondaı-aq QR Tótenshe jaǵdaılar mınıstrligi Memlekettik materıaldyq rezervter komıtetiniń «Rezerv» RMK «Kometa» fılıalynda bolyp, fılıal qyzmetiniń negizgi kórsetkishterimen, jetistikterimen jáne mindetterimen tanysty. Jumys sapary barysynda QR Ulttyq qaýipsizdik komıteti Shekara qyzmetiniń «Almaty jabdyqtaý basqarmasyna» da bardy. Munda ol óndiristik sehtyń kúrdeli jóndeý barysyn, sondaı-aq ınjenerlik qurylymdardy daıyndaý boıynsha óndiristik qyzmetti, ınjenerlik-tehnıkalyq jabdyqtardy jóndeý jáne montajdaý prosesin kórip qaıtty.
Sonymen qatar Oljas Quspekov qurylys materıaldaryn shyǵaratyn birqatar kásiporynda – kóbikti PVH qańyltyrlaryn shyǵaratyn zaýytta, sendvıch-paneldi jáne granıt zaýytynda boldy. Budan soń depýtat Almaty qalalyq máslıhatynyń otyrysyna qatysyp, onda qalanyń túıtkildi máseleleri talqylandy. Ol ózekti máselelerdi jedel sheshý jáne qala turǵyndarynyń ómir súrý jaǵdaıyn jaqsartý boıynsha máslıhat pen Májilis depýtattarynyń birlesken jumysynyń mańyzdylyǵyn atap ótti.
