Sýret: 24.kz
Kelýshiler qoldanylǵan materıaldar qalaı qaıta óńdeletinimen tanysa alady.
«Biz mundaı is-sharany jyl saıyn ótkizbekpiz. Basty maqsatymyz – Ortalyq Azııany, onyń ishinde Qazaqstandy mádenıet, qolóner arqyly tanystyrý. Keleshekte ıgi isti barlyq dızaınerimizdi shaqyryp, ótkizip tursaq deımiz», deıdi «Mádenıet kerýeni» Ortalyq Azııa shyǵarmashylyq ortalyǵynyń dırektory Elena Van Harıtonova.
Kıim dızaıneri Oksana Iаn Qazaqstanda týyp-ósken. Belgııada turǵanyna jıyrma jyldan asty. Qazaqstanǵa kezekti saparynda túıe júninen jasalǵan kórpelerdi kórip, ony qaıta óńdep, etnostılde ádemi palto tigip shyǵarýdy oılaǵan. Búginde mundaı úrdis Fransııa, Belgııa jáne Gollandııa dızaınerleri arasynda da qalyptasyp keledi.
«Men bul kórpeni kórgende ony túrlendirip, basqa ónim shyǵarý oıyma keldi. О́ıtkeni 2017 jyldan beri paıdalanylǵan materıaldardy óńdeý arqyly jasalatyn kıim brendim bar. Túıe júni jylý rettegishtik pen sýdy basatyn qasıetke ıe ekeni belgili. Onyń ústine búginde Eýropada qorshaǵan ortany qorǵaýǵa kóp kóńil bólinip jatqandyqtan, shıkizatty qaıta óńdeý ózekti», deıdi dızaıner Oksana Iаn.
Al zergergerlik buıymdar dızaıneri Kamıla Forıntını kórmege kúmisten jasaǵan qazaqtyń oıý-órnegi bar áshekeı buıymdaryn alyp kelgen. Bul buıymdar eýropalyqtardyń talǵamyna saı ózgertilip jasalǵan. Sondaı-aq erlerge arnalǵan bilezikter men moıyntumarlar da usynyldy.
Kórmege qoıylǵan qolóner buıymdary men áshekeılerinen Uly dalanyń kúsh-qýatyn sezýge bolady. «Eýropalyqtardy qyzyqtyratyn da osy erekshelik», – deıdi dızaınerler.
Aıta keteıik, qazaqstandyq qolóner sheberleriniń kórmesi 19 qańtarǵa deıin jalǵasady.
Marjan QÝATQYZY,
jýrnalıst
