Eń qymbaty – kóptiń alǵysy

Jadyraǵan jaz aıy edi. Ine-jip­ten jańa shyq­qan­daı qyzmet kıimin kıgen qu­qyq qorǵaý qyzmetkerleri jergilikti ákimshilikte ótetin saltanatty jıynǵa bet alǵan. Álden ýaqytta ýchaskelik ınspektor Rýslan Kravsýnov­tyń qalta telefony shyr ete tústi. Habarlasyp turǵan jedel járdem feldsheri eken. Rýslannyń ýchaskesindegi keıýanaǵa kómek qajet. Jedel járdem qyzmetkerleri páte­rine kire alar emes. Temir esikti ashýdyń múmkindigi taǵy joq. Oqıǵa ornyna jedel jetken Rýslan kilt sańylaýynan páter ishin barlady. Bul úıde kópten beri syrqattanyp júrgen ájeı turatyn. Kóz salyp qarasa, júzi tanys ájeı edende sulyq túsip jatyr, tipti, tirshilik belgisi de bilinbeıdi. Jyǵylǵaly da qansha ýaqyt ótkeni belgisiz. Oılanyp-tolǵanatyn ýaqyt ta joq. Endi ne isteý kerek? Ýchas­kelik ınspektor úshinshi qabattaǵy kórshi páterdiń balkony arqyly keıýananyń terezesine jetti. Onsyz da qaýsap turǵan jaqtaýdy sál ıterip, áınekti bosatyp ishke endi. Jalma-jan esikti ashyp jiberse, jedel járdem qyz­metkerleri tabaldyryqty at­taǵaly tur eken. «Sabaqty ıne sátimen» degendeı, es-tússiz jatqan keıýanaǵa ýaqtyly jedel kómek kórsetilip, aman qaldy. Qysyltaıań sátte tap­qyrlyq tanytqan ýchaskelik ıns­pektory Alǵys hatpen mara­pattaldy. Áıtse de, eń qym­baty keıýananyń týystary jaýdyrǵan aq tilek edi.

2023 jyldyń qazan aıynyń 28-i kúni ákimshilik ýchaskeni aralap kele jatqan bolatyn. Qas qaraıyp, ymyrt úıirilgen sát. Qyzmet kóligine ornatylǵan rasııa arqyly taǵy bir sýyt habar tústi. Jalǵyzilikti keıýana talma aýyrymen aýyrady eken. О́z betinshe esik ashýǵa dármeni joq. Rýslan mekenjaıyn birden anyqtap, jedel jetti. Bul joly da esikti ashý múmkin bolmaǵandyqtan, terezeniń áınegin shyntaǵymen uryp syndyryp, ishke endi. Esik aldynda turǵan jedel jár­dem qyzmetkerleri keıýanany ile ala jóneldi. Der kezin­de medısınalyq qyzmet kórse­tilgendikten, dármensiz keıýana ajal aýzynan aman qaldy.

О́tken jyldyń aqpan aıynda ýchaskelik ınspektor jergilikti turǵyndarǵa sońǵy ýaqytta alaıaqtyq oqıǵalardyń kóbeıip ketkeni týraly aıtyp, beıtanys adamdarǵa ózderi jaıyndaǵy málimetterdi bermeýi kerektigi týraly eskertip júrgen edi. Kezekti bir turǵyn úıge engen kezde irgedegi páterden áldebir áıel adamnyń derekterdi aıtyp jatqanyn qulaǵy shalyp qaldy. Ishki túısik aldamapty. Alaıaqtar ańqaý áıeldi aldap, ­8 mln teńgege nesıe rásimde­mek­shi eken. Mán-jaıdy bilgennen keıin birden bankpen habarlasyp, nesıe rásimdeýdi toqtatty.

– Keıingi kezde alaıaqtyq ister týraly kópshilik habardar bolǵanymen, aldy-artyn oılaı bermeıtin ańǵal adamdar da kezdesip qalady, – deıdi ýchaskelik ınspektor Rýslan Vıktorovıch.

Eńbegi el aýzyna ilinip júr­gen polısııa qyzmetkerimen tildese kele, onyń bala kezinen-aq osy qyzmetti ańsaǵany, armandaǵany kórinip turdy. Oǵan polısııa qyzmetkerleri týraly kórkem fılmder áser etse kerek. Mamandyq tańdaýda múlt ketpeýine anasy Elena Vıktorovna da yqpal etipti. Jasóspirim kezinde polısııa qyzmetkerleriniń erlikke toly is-qımyly sıpattalatyn ádebı kitaptardy kóp oqypty. О́zi de sondaı bıikke kóterilgisi, adaldyq pen shyndyqty qorǵaǵysy kelgen. Ol úshin, árıne, polı­sııa qyzmetkeri kúshti bolýy kerek dep túısingen. Sabaqty jaqsy oqýymen qatar sportty da janyna serik etken. Aýyr atletıka men grek-rım kúre­sine qatysqan. Áldeneshe márte jarystarda jeńis tuǵyryna kóterilgen. 2013 jyly Atbasar qalasyndaǵy kol­ledjge oqýǵa túsken. Zań­ger mamandyǵy bo­ıynsha. 2016 jyly erte kóktem­de Atba­sar qala­syn qyzyl sý basyp qal­ǵanda eriktiler qatarynda ta­bylǵan. «Qutqarý operasııa­laryna belsendi qatysqany úshin» medalimen marapattalypty. Atbasar aýdandyq polısııa bólimshesinde óndiris­tik tájirıbeden ótken kezde krımınalıstıkaǵa kóńili aýǵan. Jas jigittiń boıyndaǵy tabıǵı beıimdi shyńdaýǵa polısııa maıorlary K.Daýylbaev pen A.Jákishevter yqpal etken. Tájirıbe jumysy aıaqtalǵan ­soń óz betinshe bilimin jetildi­rý­ge kúsh salǵan. Osy bólimde tórt jyl taban aýdarmastan eń­bek etken. 2016 jyly Rýslan Reseıdiń F.M.Dostoevskıı atyn­daǵy Omby memlekettik ýnı­versıtetine oqýǵa túsken. Ýnıversıtet qabyrǵasynda tolymdy teorııalyq bilim aldy.

Rýslan Vıktorovıch Atba­sar qalasynda ýchaskelik ıns­pektor retinde 2018 jyldan beri qyzmet etedi. Minsiz qyz­meti úshin birneshe márte ma­rapatqa ıe bolǵan. О́tken jyl­dyń naýryz aıynda Omby qala­syndaǵy bir kezde ózi oqyǵan ýnıversıtettiń magıstratýrasyna túsipti. Endigi armany – qyzmetin ǵylymmen ushtasty­rý. Nesi bar, «Talaptyǵa nur jaýar» degendeı, aldyna qoıǵan maqsatyna jetpeı tynbaıtyn R.Kravsýnovtyń bul bıikke de shyǵaryna senim mol.

Aqmola oblysy,

Atbasar aýdany