Foto: liter.kz
Qomaqty qarjy quıylǵanmen baıraqty básekelerde joǵary nátıje baıqalmaǵan. Álemdik sport reıtınginde Qazaqstan 2014 jyly 25-orynda bolsa, 2023 jyly 42-orynǵa túsip qalǵan. Buryn bólingen aqshanyń 60 paıyzy Olımpıadalyq emes sport túrlerine baǵyttalǵanyn aıtqan depýtat Nartaı Aralbaıuly joǵary jetistikter sportynyń naqty anyqtamasy bekitilgenin habarlady.
«Endi joǵary jetistikter sportyna - Olımpıada, paraolımpıada, sýrdlımpıada, azııa, paraazııa jáne ulttyq sport túrleri ǵana enedi. Bul búginge deıin tirkelip ketken 180-nen astam sport túrin 3 ese qysqartýǵa múmkindik beredi. Máselen sońǵy 6 jylda 49 mlrd teńge alǵan «Barys» hokkeı klýby, sońǵy 6 jylda 50 mlrd teńge alǵan «Astana» fýtbol klýby syndy komandalardyń ár tıyn úshin esep beretin kúni týýy tıis. Osynsha aqsha alǵanyna qaramastan atalǵan komandalardyń óz ınfraqurylymdary joq. Bir ǵana «Astana» fýtbol klýby alty jyl ishinde tek fýtbol alańdary men ǵımarattardy jalǵa alýǵa 1,4 mlrd teńge jumsaǵan», dedi depýtat.
El sportyna serpin berýge baǵyttalǵan qarjynyń biraz bóligi legıonerlerdi ustaýǵa jumsalatynyn Sybaılas jemqorlyqqa qarsy is-qımyl agenttigi málimdegen edi. Táýelsizdik alǵannan beri Qazaqstan 126 sheteldik sportshyǵa azamattyq bergen, biraq olardyń árbir ekinshisi keıin óz eline qaıtyp ketken.
«Budan bólek keı federasııalardyń zań jobasy endi sport túrlerin shekteıdi degeni de shyndyqqa janaspaıdy. Sebebi zań jobasynda 1 federasııada 1 sport túri ǵana bolady dep jazyldy, bul bir júıeni qalyptastyrý úshin kerek. Sebebi keı federasııalardyń quramyna 5-10 sport túri tirkelip ketken. Týrızm jáne sport mınıstrligi zań jobasyna qatysty túsindirý jumystaryn kóbeıtýi qajet. Mádenıet jáne aqparat mınıstrligi jalǵan aqparat taratyp eldi dúrliktirgen aqparat quraldary men ınternet qoldanýshylarǵa tıisti shara qoldanýy qajet. Sport federasııalarynyń aqparattyq jumysqa qansha qarjy jumsaıtynyn tekserý kerek», dedi Nartaı Aralbaıuly.
