«Embimunaıgaz» AQ bas dırektory Rınat Izmuhanbettiń málimetinshe, munaıshylar byltyr 2,79 mln tonna kómirsýtekti shıkizat óndirip, jospar 17 myń tonnaǵa asyra oryndalypty. Endi Batys Prorva ken ornyndaǵy gaz shoǵyryn ıgerý úshin ınfraqurylymdy keńeıtý jumystary qolǵa alynyp otyr. Atalǵan jobany úsh kezeńmen iske asyrý kózdeledi.
«Bıylǵy maýsymda birinshi kezeńi iske qosylady. Bul kompanııanyń munaı óndirý kólemin jylyna 45 myń tonnaǵa, gaz óndirýdi 160 mln tekshe metrge deıin ulǵaıtýǵa múmkindik beredi. 2026–2027 jyldary jobanyń ekinshi jáne úshinshi kezeńin iske asyrý josparlandy. Ekinshi kezeńde gaz daıyndaýdyń óndiristik qýaty 350 mln tekshe metrge jetkiziledi. Úshinshi kezeńde bul kórsetkish 600 mln tekshe metrge ulǵaıady», deıdi R.Izmuhanbet.
Bas dırektordyń aıtýynsha, bıyl Prorva ken ornyndaǵy munaı daıyndaý jáne aıdaý sehyn rekonstrýksııalaý jáne jańǵyrtý jobasyn ázirleý jumystary bastalady. Atalǵan joba eskirgen jabdyqty kezeń-kezeńimen aýystyrýǵa, tehnologııalyq shemany jańartýǵa baǵyttalyp otyr. Bul jabdyqtyń senimdiligin arttyrýǵa jáne ónim berýdi jylyna 3 mln tonnaǵa deıin ulǵaıtýǵa jol ashady. Jańǵyrtý jańa ken oryndarynda «qara altyn» óndirý kóleminiń josparly ulǵaıýyna baılanysty júrgiziledi.
«Jyl sońyna deıin Batys Qarasor ken ornynda munaı óndirýdi bastaý mindeti qoıyldy. Ken ornyn ıgerýdiń eń joǵary deńgeıinde qosymsha 60-65 myń tonna munaı óndirý bolady. Taǵy bir ınvestısııalyq joba – Ońtústik-Shyǵys Novobogat ken ornynda gaz daıyndaý qondyrǵysyn salý. Ken oryndarynda ıgerý jumystaryn bastaý 100 myń tonna munaı alýǵa múmkindik beredi», deıdi R.Izmuhanbet.
Mundaı jobalardy iske asyrýdyń tıimdiligi nede? Bas dırektor Rınat Izmuhambettiń pikirinshe, bul aldymen munaı men gaz óndirý kólemin ulǵaıtýǵa serpin beredi. Ekinshiden, kompanııanyń turaqty damýyn qamtamasyz etedi. Úshinshiden, óńirdegi áleýmettik turaqtylyqty saqtaýǵa oń áserin tıgizedi.
«QazMunaıGaz» UK» AQ basqarma tóraǵasy Ashat Hasenovtiń málimdeýinshe, otandyq munaıshylarǵa eski ken oryndaryn tıimdi paıdalaný deńgeıine shyǵarý mindeti qoıylyp otyr.
Qazir Atyraýdaǵy enshiles kompanııanyń bas keńsesindegi vızýalızasııa ortalyǵynyń fýnksıonaldy múmkindigi keńeıgen. О́ndiristik qyzmetti tıimdi basqarý jáne derekterge saraptama júrgizý úshin tehnologııalar udaıy jetildiriledi. Ortalyqtaǵy monıtordan ken oryndaryndaǵy munaı óndirý úderisin, kólik qozǵalysyn baqylaýǵa bolady. Máselen, Qyzylqoǵa aýdanyndaǵy «Ýaz» ken ornynda 2016 jyly «Intellektýaldy ken orny» jobasy iske qosylǵan. Bul – jańa ınnovasııalyq tehnologııa transformasııalaý baǵdarlamasy aıasyndaǵy qanatqaqty jobanyń birinshi kezegi. Al ıntellektýaldy ken orny – munaı qoryn ońtaıly ıgerý úshin basqarý pýltine uńǵymalardan aqparatty berýge jol ashatyn ınnovasııalyq tehnologııa. Mamandardyń túsindirýinshe, birinshiden, ıntellektýaldy uńǵymalardyń deregi úzdiksiz óńdeledi. Ekinshiden, jedel baqylaý júrgiziledi. Úshinshiden, shuǵyl sheshimder qabyldaý úshin aqparattarǵa monıtorıng jasalady.
Kompanııada tıimdiligi dáleldenip otyrǵan taǵy bir sıfrlyq bastama – jol qozǵalysy qaýipsizdigin qamtamasyz etýge arnalǵan «Saparlardy basqarý» jobasy. «Embimunaıgaz» AQ-da kólikter men arnaıy tehnıkalardyń jyldamdyǵy, qozǵalysy, tipti baǵytynan aýytqý men júrgizýshiniń, ne ózge mamannyń qaýipsizdik beldigin taqqany ne taqpaǵany arnaıy monıtorda kórinip turady. Kólik quraldarynyń biryńǵaı monıtorıngi qyzmetiniń nátıjesinde jol-kólik oqıǵalarynyń sany kúrt azaıyp, janarmaıdy únemdeý úlesi artqan.
Qazir «Embimunaıgaz» AQ munaıshylary tórt aýdannan munaı óndiredi. Sonyń biri – qazaq munaıynyń alǵashqy tamshysy alynǵan Jylyoı aýdany. Munda eki kásiporynnyń birigýimen qaıta qurylǵan «Jylyoımunaıgaz» munaı-gaz óndirý basqarmasy bar. Kompanııanyń bul aýdanda ken orny da, munaıshysy da kóp. Prorva ken alańyndaǵy ilespe gazdy keshendi daıyndaý qondyrǵysy 2017 jyly iske qosylǵan. Oǵan 90 adam jumysqa tartylǵan. Qondyrǵy 150 mln tekshe metr gaz óńdeıdi. Ilespe gazdy óńdeý tehnologııasy ekologııalyq qaýipsiz ári kúkirtsýtekti joıýda joǵary tıimdilikti qamtamasyz etedi. Gazdy keshendi daıyndaý jumysy tolyǵymen avtomattandyrylyp, tótenshe jaǵdaıdan birneshe deńgeıli qorǵanyspen qamtylǵan. О́ńdelgen gazdyń 90 mln tekshe metri qubyrmen jóneltiledi. 35 mln tekshe metr gaz ken alańdaryndaǵy óndiristik qajettilik úshin paıdalanylady. Ilespe gazdyń ózge bóliginen kúkirt túıirshikteledi. Munda jylyna 2 700 tonna túıirshiktelgen kúkirt shyǵarylady.
Atyraý oblysy
