«Atakent» iskerlik ortalyǵynda jınalǵan 200-den astam qatysýshylar EAEO elderi ǵana emes, odan tysqary keńistiktegi JI jetistikterin talqylady.
Plenarlyq otyrysta Premer-mınıstr Oljas Bektenov jasandy ıntellekti damytý úshin adamı kapıtal men sıfrlyq ınfraqurylymdy damytý, ıaǵnı onyń men ınstıtýsıonaldyq negizin qurý qajettigin atap ótti.
«Búginde biz jasandy ıntellekt dáýirinde ómir súrip, damyp jatyrmyz. IDC analıtıkalyq kompanııasynyń zertteýine sáıkes, 2030 jylǵa qaraı AI-niń álemdik ekonomıkaǵa qosqan úlesi shamamen 20 trln dollarǵa jetedi. Bul rette tek JI tehnologııalary esebinen JIО́ ósimin jyl saıyn 2-3 paıyzǵa jetkizýge bolady. Bul múmkindikti elderdiń ekonomıkasyn damytý úshin paıdalaný qajet», dep atap ótken Úkimet basshysy Alem.AI ortalyq bazasynda jasandy ıntellekt salasyndaǵy birlesken R&D jobalaryn ázirleýde EAEO boıynsha áriptesterdiń kúsh-jigerin biriktirý qajettigine nazar aýdardy:
«Memleket basshysy Qasym-Jomart Toqaev Alem.AI halyqaralyq jasandy ıntellekt ortalyǵynyń negizinde quziretter ekojúıesin qurý bastamasyn kóterdi. Ol bıyl Astanada ashylady. Bul bir alańda jetekshi IT-kompanııalardy, zertteý zerthanalaryn, startaptar men sheshimderdi birlesip ázirleý úshin bilim berý baǵdarlamalaryn biriktirýge múmkindik beredi. Álemde jasandy ıntellektiniń jahandyq modeli jedel túrde básekelestikten kooperatıvtik úlgige aýysyp, IT-ındýstrııa kóshbasshylary yntymaqtasa otyryp, ǵylymı-zertteý jobalaryn birlese júzege asyryp, tanymal platformalarda tehnologııalardy damytý maqsatynda óz ázirlemelerimen bólisip jatyr. Bul tájirıbeni ózimizdiń, sondaı-aq birlesip jasalatyn ázirlemeler úshin paıdalanýymyz kerek», dep atap ótti Premer-mınıstr.
Osyǵan baılanysty jasandy ıntellekt salasynda mamandar daıarlaý basym mindetterdiń birine aınalyp otyr. Aldaǵy 5 jylda 1 mln adamdy oqytý josparlanyp, júıeli jumystar qolǵa alynbaq. Byltyr elimizde Tomorrow School jasandy ıntellekt mektebi ashyldy. Munda bilim berý úderisi ınnovasııalyq ádisterge, sonyń ishinde geımıfıkasııaǵa jáne oqytýshylardy qajet etpeıtin peer-to-peer júıesine negizdelgen. Qazaqstan bilikti kadrlardy daıarlaýda standartty emes tásilderdi engizý máselelerinde tájirıbe almasýǵa daıyn.
Qazirgi kezde ınstıtýsıonaldyq negizin qalyptastyrý sheńberinde Ulttyq jasandy ıntellekt strategııasyn ázirleýge negiz bolatyn Tujyrymdama bekitildi. Innovasııalardy damytýǵa quqyqtyq negiz bolatyn jasandy ıntellekt týraly zań jobasyn ázirlendi. Munymen qosa Prezıdent janynan ozyq tehnologııalardy engizý úshin jetekshi otandyq jáne halyqaralyq sarapshylardy biriktiretin jasandy ıntellektini damytý jónindegi keńes qurylatyn bolady. AI-startaptaryn qoldaý úshin Astana Hub bazasynda $1 mlrd-ty quraıtyn Venchýrlik ınvestısııalar Qory quryldy.
Búginde 1500-nan astam Astana Hub qatysýshylarynyń 150-i AI-startaptary. Olardyń qatarynda Higgsfield AI, Cerebra AI, CodiPlay, Arlan Biotech jáne Alaqan sııaqty jobalar bar. Olardyń keıbiriniń baǵasy 100 mıllıon dollarǵa jetti.
Úkimet basshysy jasandy ıntellekti damytýda eńbek naryǵyna áser etetin syn-qaterlerdi, mamandardy qaıta daıarlaý, etıka, ekologııalyq júkteme jáne tehnologııalarǵa qol jetkizýdi qamtamasyz etýmen baılanysty mańyzdy aspektilerdi atap ótti.
Digital Almaty forýmynda EAEO elderi úkimet basshylaryna Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev Alem.ai halyqaralyq jasandy ıntellekt ortalyǵy stendimen tanystyrdy. Jasandy ıntellekt qazirdiń ózinde jahandyq ekonomıkany ózgertti. Bul baǵytta Qazaqstan kóshbasshylar qatarynan tabylýǵa umtylyp jatyr.
Mınıstr ulttyq baǵdarlama aıasynda 2030 jylǵa qaraı oqytylatyndar qatarynda AI Kyzmet Bootcamp baǵdarlamasy aıasynda 500 myń oqýshy, 300 myń stýdent, sondaı-aq 90 myń memlekettik qyzmetshi bar ekenin atap ótti. JI salasyndaǵy zamanaýı bilimge qol jetkizýdi qamtamasyz etý úshin AI Movement jáne LMS bilim berý platformalaryn damytý, sondaı-aq oqýshylar arasynda AI Olymp respýblıkalyq olımpıadasyn ótkizý josparlanyp jatyr.
Forýmda elimizdiń jáne shetelderdiń JI-startaptary men jobalary usynyldy. Olardyń qatarynda búginde 13 elde qoldanylyp jatqan Codiplay mobıldi qosymshasy bar. IT-saýat qosymshasy boıynsha 13 mln bala bilim alyp jatyr. Sondaı-aq Oqylyq, Alaqan qosymshalary bilim oshaqtarynda tıimdiligin kórsetip otyr. Shynaıy ómirdi modeldeý janrynda tanystyrylǵan Grand Mobile oıynyn paıdalanýshylar sany aıyna 5 mln-nan asatyn bolsa, iri kásiporynnyń jumysyn basqarýǵa múmkindik beretin AMK X Belka AI tehnologııasyn Aqtóbe mys óndirisine engizilgen.
ALMATY
