Sýret: multiurok.ru
Jezdem jarap baıaǵy burylysqa on shaqyrym jetkizbeı kútip aldy. Kútip alǵan jerinen qımaı shyǵaryp ta saldy.
* * *
Aýmaly-tókpeli zaman, bir mezet, muǵalimdigimnen baıaǵy qyzmetti bastaǵan gazetime jaýapty hatshy bolyp bara qaldym. Jezdemniń «jelke qasıtyndyǵyn» bilsem de, jol júrer aldynda habarlasyp paryzymdy ótedim.
Úıine deıin óz aıaǵymmen bardym. Jezdem ún-túnsiz, aýzyn býǵan ógizdiń keıpin kıipti. Barǵannan kóligin shuqylaýmen bolyp edi, keterde kóliginiń astynda jatyp qoshtasty.
* * *
Aýmaly-tókpelisi ras, jaýapty hatshylyqtan álgi ınstıtýtyma aǵa muǵalimdikke bara qalmaspyn ba. Kóp ótpeı, kandıdattyǵym qorǵaldy, dosent degen dárejesin de bergen.
Sodan, jáı-japsardy aıtyp jezdeme jetkizip edim. Oıpyr-aı, týra jarty joldyń bergi tusynan kútip aldy. Rızashylyq, syı-sııapat bir tóbe, keterimizde — jarty joldan asyp jyǵylyp shyǵaryp salyp áreń-páreń qushaq ajyrasyp qutyldyq.
* * *
...Iá, taǵdyr solaı, taǵy da jezdemdi jelke qasytyp, burynǵy qyzmet etken jerime redaktordyń orynbasary bop bara qaldym...
...Jezdem kútip almaıdy eken dep aýylǵa at izin salmas men emes, ókimettiń kóligimen-aq jetip jyǵylǵanbyz. Jezdemniń kútim-qabaǵyna qarap qalǵan men emes, aýyl ózimdiki, aýnap-qýnap kelgen jolymmen kedergisiz-aq kete bardym.
...Oılamaǵan jerden, baǵym janyp deýshi me edi, álgi baıaǵy fakýltetime bastyq bop aýysa qalmasym bar ma.
Qaıdan estigenin, aýylǵa júretinimdi kimnen bilgenin, kúni buryn alyp ketýge keldim dep jezdem kepti.
Aýylda qyran-topan kishigirim toı jasaldy dese de bolady. Aýyl arasynyń ózinde: «О́zińdeı baldyzdyń jaıaý jalpylap júrgeni maǵan uıat» dep jezdem qarys attatpady. Bolmaı qalaǵa deıin ákep tastaǵanda jasy úlken jezdemniń aldynda yńǵaısyzdanyp qaldym.
* * *
«Áziliń jarassa atańmen oına» degen bar, jezdeme qaıter eken dep: «Solaı da solaı... qyzmetimdi ótkizip jatyrmyn, sol baıaǵy gazetime jiberetin túri bar» dep habarlasyp edim, ókinip, kúpinip, sóziniń aıaǵyn: « Atańa nálet máshınem de bir kún saý, bir kún aýrý, dińkeletip bitirdi. Qarnyn jaryp, qańqasyn qaldyryp qamap qoıdym, áı bıylǵa qozǵala qoımas...» dep bitirdi.
Úıine óz aıaǵymmen baryp otyryp as ústinde taǵy da qaljyńǵa buryp: «Jolym bolyp, gazetke barmaıtyn bolyp, dekandyqtan prorektorlyqqa joǵarylatty» dep edim, jezdem iship otyrǵan tamaǵyna shashalyp kógerip-sazaryp aýrýhanaǵa túsip, áıteýir, áreń-páreń aman qalǵany bar.
Búıtken qaljyńy da qurysyn, óıtken qyzmeti de bar bolsyn dep, endigári ol jóninde jezdeme lám-mım demes bolyp, aýylǵa da kelýdi sıretetin bolyp ózime-ózim ýáde berip qaıttym.
Berik SADYR
