Sýretti túsirgen – Iýrıı Bekker
Konserttik baǵdarlamada Qazaqstan, Reseı, О́zbekstan jáne Tatarstannyń tanymal horeograftarynyń qoıylymdary usynyldy. Jańadan qurylǵan jas shyǵarmashylyq ujymnyń Almatydaǵy alǵashqy konsertin Mádenıet jáne aqparat mınıstri Aıda Balaeva, sondaı-aq mádenıet, óner jáne qoǵam qaıratkerleri tamashalady.
Belgili óner sheberleri men jas talanttar jappaı jáne jeke horeografııalyq kompozısııalar, aspaptyq jáne vokaldyq nómirlerdi oryndady. Almatylyq talǵampaz kórermen aldynda shabytpen oryndalǵan «Kúı shashý» bıi, halyq ánderinen popýrrı, uıǵyr, koreı, tatar bıleri jáne basqa da sahnalyq qoıylymdardan zamanaýı izdenis izderi tanylyp, tamashalaǵan qaýymdy tánti etti.
Is-sharaǵa Roza Baǵlanova atyndaǵy «Qazaqkonsert» memlekettik akademııalyq konserttik uıymynyń «Astana sazy» qazaq memlekettik folklorlyq ansambli, Qurmanǵazy atyndaǵy Qazaq ulttyq konservatorııasy, Respýblıkalyq memlekettik akademııalyq koreı mýzykalyq komedııa teatry, A.Jubanov atyndaǵy mýzyka mektebiniń talantty oqýshylary, P.Chaıkovskıı atyndaǵy Almaty mýzykalyq kolledjiniń «Dostlýq» uıǵyr halyq aspaptar ansambli, «Rýhsara» bı ujymy, «Nava» ansambli jáne «Bahar» kavkaz bı ansambli qatysty.
– Bul – ulttar men memleketter arasyndaǵy mádenıetaralyq dıalogtiń úlgisi. Beıbitshilik pen mádenı dıplomatııanyń týyn kótergen ansambl Ortalyq Azııanyń ǵana emes, kúlli álemniń birligi úshin ún qatady. Shyǵarmashylyq ujymnyń quramynda ártúrli ulttyń talantty ul-qyzdary óner kórsetedi. Negizinen horeografııa akademııasynyń túlekteri jumys isteıtin «Birlik» ansambliniń qurylǵanyna bir jyl ǵana bolsa da, osy ýaqyt aralyǵynda ol Túrkııa, Reseı, Túrikmenstan kórermenderiniń aldynda tabysty óner kórsetti. Ansambl quramynda ózge ártisten bólek, 24 bıshi bar. Bıyl alǵash ret Eýropaǵa sapar shegip, Parıj tórinde konsert berýdi josparlap otyrmyz, – deıdi «Birlik» ansambliniń kórkemdik jetekshisi ári bıshisi Anel Marabaeva.
Konserttiń basty maqsaty – kórermenderdi ártúrli etnostardyń bı, án jáne mýzykalyq shyǵarmalaryn qamtıtyn elimizdiń baı ulttyq ónerimen tanystyrý. Konsert elimizdiń birligi men mádenı ártúrliligin kórsetetin, kelisim ıdeıalaryn nasıhattaýǵa shaqyratyn shyǵarmashylyq alańǵa aınaldy.
Aıta keteıik, «Birlik» ansambli 2024 jyldyń 1 naýryzynda quryldy. Bul – Qazaqstan men TMD-daǵy alǵashqy kópultty án men bı ansambli. Ujymnyń biregeı repertýary qazaq halqynyń tarıhymen jáne táýelsiz Qazaqstannyń qalyptasýymen tyǵyz baılanysty etnostardyń mýzykalyq murasy men ónerin qamtıdy.
Eldiń yntymaǵyn dáriptep, ár ulttyń óneri men mádenıetin óristetýdi maqsat etken «Birlik» ansambliniń qurylǵanyna jylǵa jýyq ýaqyt ótse de, ujym músheleri osy konsert arqyly qysqa merzim ishinde repertýar qoryn tolyqtyrýda talmaı eńbek etkenin tanytty. Konsert sońynda Mádenıet jáne aqparat mınıstrliginiń atynan shyǵarmashylyq ujymǵa yqylas gúli tartý etildi.
ALMATY
