Osyǵan oraı mýzeıde qos mereıtoı bastalyp ta ketti. «Abaı – álemdik oıdyń alyby» jáne «Abaı beıneleý ónerinde» atty mádenı-tanymdyq kórmelerdiń tusaýy kesildi. Is-sharada sóz alǵan Abaı oblysy ákiminiń orynbasary Jasulan Sársebaev, Abaı mýzeıiniń dırektory Ulan Saǵadıev, oblystyq ardagerler keńesiniń tóraǵasy Murat Alın osy óńirge tanymal zııaly qaýym ókilderi men mádenıet jáne óner mekemeleriniń qyzmetkerlerin Abaı toıymen quttyqtap, lebizderin bildirdi. «Qarańǵy túnde taý qalǵyp», «Segizaıaq» syndy ánderi shyrqalyp, jınalǵan kópshilik Abaı atyndaǵy mýzykaly-drama teatrynyń «Jaza-Naza» tragedııasynan úzindi tamashalady.
«Abaı – álemdik oıdyń alyby» atty kórmede mýzeı qoryndaǵy kitaptar men qoljazbalar, estelikter, taqyrypqa baılanysty turmystyq zattar men eleýli eksponattar kórermen nazaryna usynyldy. Onda Abaıdyń 1909 jyly Sankt-Peterbýrgte basylǵan tuńǵysh óleńder jınaǵy, 1922 jyly Qazan, 1933 jyly Qyzylorda qalalarynda jaryqqa shyqqan kitaptary qoıyldy.
El Prezıdenti Q.Toqaevtyń tapsyrmasymen jaryq kórgen A.Qunanbaıuly shyǵarmalarynyń álem tilderine aýdarylǵan 10 tomdyǵy, aqynnyń ár jyldary atalyp ótken mereıtoılaryna oraı Abaı mýzeıiniń asyl qoryna tabystalǵan kádesyılar da meımandardyń erekshe tańdanysyn týdyrdy.
«Abaı – beıneleý ónerinde» dep atalatyn kórmede elimizge belgili qylqalam sheberleri Janataı Shardenov, Nurbulan О́tepbaev, Qaıyr Orazǵalıev, Ádilqaıyr Jantasov syndy sýretshiler salǵan aqyn beınesi qoıyldy. Bularǵa qosa hakim tulǵasyn Alashymen qaýyshtyrǵan basqa da tańdaýly sýretter shyǵarylypty. Kemeńger tulǵasyn somdaý arqyly qazaq beıneleý ónerin baıytqan bul týyndylar Abaı mýzeıiniń asyl qoryn baıytyp qana qoımaı, abaıtaný arnasyn keńeıte túsetini anyq.
«Alys-jaqynnan keletin qonaqtardyń kóńil tarazysyna keskindeme, grafıka, kesteleý jáne taǵy basqa tehnıkamen jasalǵan F.Hasenov, N.О́tepbaev, S.Sýhov, Á.Jantasov, O.Qaıyr, M.Baqytbekova, T.Shapaǵat, A.Belov, N.Jarqynbaev sııaqty sýretshilerdiń tyń týyndylary usynyldy. Bul týyndylar mýzeı qoryna keıingi jyldary túskendikten, osyǵan deıin mýzeı ekspozısııasy men kórmelerge shyqpaǵan dúnıeler», deıdi Abaı mýzeıiniń dırektory Ulan Saǵadıev.
Abaı mýzeıi alǵash irgetasyn kótergen kúnnen bastap aqyn tulǵasyn arqaý etken beıneleý óneri týyndylarymen tolyǵyp keledi. Búginde mýzeı qorynda 900-den asa beıneleý óneriniń tańdaýly týyndylary saqtalǵan. Abaı taqyryby qashanda óner qaıratkerleri úshin shyǵarmashylyqtyń qaınar kózi bolyp, qylqalamdy serik etken jandarǵa erekshe shabyt syılaıdy. Ýaqyt ótken saıyn aqyn tulǵasy bıiktep qana qoımaı, onyń kindik qany tamǵan týǵan jeriniń tabıǵaty qylqalam ıelerin tolǵandyryp, dúnıege talaı týyndy ákelýge sebep boldy.
SEMEI
