foto: QR Ulttyq mýzeı
«Sıfrlandyrý aqparat keńistiginiń ashyqtyǵyn arttyryp, halyqqa jedel ári sapaly málimet jetkizýge múmkindik bereri anyq. Bul ásirese jalǵan aqparatpen kúresýde óte mańyzdy. Biz Big Data jáne jasandy ıntellekt negizinde aqparat aǵynyn súzgiden ótkizip, qoǵamǵa senimdi aqparat taratý júıesin jetildirýge tıispiz», dep atap ótti Aıda Balaeva.
Mınıstr sonymen qatar ulttyq qundylyqtardy zamanaýı tehnologııalarmen ushtastyra otyryp, rýhanı murany keńinen nasıhattaýdyń mańyzyna toqtaldy. Osyǵan baılanysty arhıv, kitaphana jáne mýzeı qorlaryn sıfrlyq formatqa kóshirý jumystaryn kúsheıtý qajet ekenin atap ótti.
Budan bólek, Aıda Balaevanyń aıtýynsha, qazaqtyń ulttyq folkloryn ınteraktıvti, anımasııalyq, ınfografıkalyq jáne ıllıýstratıvti formatta jasaý josparlanǵan. Bul maqsatqa jasandy ıntellekt tehnologııalary qoldanylmaq.
«Bıyl Qazaqstan mýzeıleriniń vırtýaldy jelisi «E-museum» veb-portalyn ashýdy josparlap otyrmyz. Álemniń kez kelgen buryshyndaǵy paıdalanýshylar mádenı muralarymyzdy 3D modelder arqyly tamashalaý úshin kórneki jáne ınteraktıvti tehnologııalar engiziledi», dedi mınıstr.
Alǵa qoıylǵan josparlardyń qatarynda qazaqstandyq fılmder, serıaldar men anımasııalyq týyndylardy qamtıtyn strımıng platformany iske qosý bar.
Sonymen qatar, Uly Jeńistiń 80 jyldyǵy aıasynda mınıstrlik «Batyrlarǵa taǵzym» atty onlaın-platformany iske qospaq. Bul platformada ekinshi dúnıejúzilik soǵysqa qatysqan qazaqstandyqtar týraly málimetter usynylady.
