Bıyl Ulttyq kınony qoldaý ortalyǵy janyndaǵy saraptama keńesiniń quramy jańartyldy. Oǵan kıno, ádebıet, mádenıet salasyndaǵy mamandar, sondaı-aq Májilis depýtattary kirdi.
Kezdesýdiń negizgi taqyryby kınojobalardy konkýrstyq irikteý erejelerin talqylaý boldy.
Mınıstr Ulttyq kınony qoldaý ortalyǵynyń qyzmeti týraly egjeı-tegjeıli aıtyp berdi. Ol saraptama keńesi múshelerine úlken jaýapkershilik júkteletinin atap ótti. О́tken jyly qabyldanǵan irikteý konkýrsynyń erejelerindegi ózgerister irikteýdiń ashyq ári jeńil ótýine baǵyttalǵanyn da atap ótken jón.
Jańa erejelerge sáıkes, irikteý eki kezeńge bólingen. Bul ózgeris Qazaqstandaǵy kıno óneriniń damýyna jańa serpin beredi.
Birinshi kezeńde saraptama keńesi tek ssenarııler men ssenarıı josparlaryn saralaıdy. Birinshi kezeńnen sátti ótkennen keıin tańdalǵan ssenarıılerdiń avtorlary ekinshi kezeńde qujattardyń tolyq paketin usynýy kerek. Úmitkerler qajetti qujattardy tapsyrǵannan keıin anyqtalǵan qatelerdi túzetýge úsh kún ýaqyt beriledi. Qujattardy qabyldaý aıaqtalǵan soń, Ortalyq saraptama keńesiniń qaraýyna ótinim jiberedi. Sodan keıin pıtchıng kúni belgilenedi.
«Keńes músheleri jaýapkershilikti tereń sezinip, konkýrstyń barlyq kezeńderinde ádil sheshim shyǵaryp, ashyq konkýrs ótkizýge tıis. Kınojobalardyń belgilengen talaptarǵa sáıkes bolýyna basa nazar aýdarylady. Bul sharalar otandyq kıno salasyn damytýǵa, sondaı-aq ulttyq múdde men ıdeologııaǵa saı keletin jobalar sanyn arttyrýǵa kómektesedi», - dep atap ótti Aıda Balaeva.
2025 jyly «ulttyq qundylyqtar», «otbasy», «qorshaǵan ortany qorǵaý», «zań men tártip», «tarıhı eleýli oqıǵalar», «dos qadiri», «áıel quqyǵy, bala qaýipsizdigi»,«qazirgi zamannyń qaharmandary», «el birligi» jáne t.b. basym taqyryptarda kınojobalar daıyndaýǵa bolady.
2025 jyly Mınıstrliktiń jáne Ulttyq kınony qoldaý ortalyǵynyń qoldaýymen 10 jańa fılm jaryq kóredi. Bıyl «Kapıtan Baıtasov», lýdomanııa taqyrybyn qozǵaıtyn «Igromanka» atty drama, fýtbol týraly «90+1» sporttyq dramasy, sondaı-aq «Kúzgi samal», «Feıkovyı arman», «Qaitadan», «Tezek», «Qara qyz», «Altyn adam», «Hosh ıisti júrek» jáne «Avel» fılmderi jaryqqa shyǵady.
