Foto: ashyq derekkóz
Erlan Saırov keıingi jyldary Úkimet pen jergilikti bılik júzege asyryp jatqan ınfraqurylymdyq nysandardy salý jobalarynyń kúrt qymbattaǵanyn atap ótti.
«Máselen, Almatyda metro salý kezinde «Bazıs-A» merdigerine ár joly qosymsha mıllıardtaǵan teńge bólinedi, biraq sonymen birge jumys kólemi de azaıyp otyr.
Buǵan qosa 30 jyldan beri Ekibastuzda úshinshi energoblok salý týraly áńgime júrip keledi. 2012 jylǵy qańtarda Ekibastuz MAES-2 quny 73,9 mıllıard teńge bolatyn qazandyq pen týrboagregat daıyndaýǵa arnalǵan shartqa qol qoıdy jáne 38 mıllıard teńge kóleminde aldyn ala tólem júrgizdi. Alaıda, jumys osy kúnge deıin aıaqtalǵan joq.
Joǵary aýdıtorlyq Palatanyń málimetterine sáıkes tek gaz qubyrlaryn salý jobasy boıynsha 2023 jyly qurylys qunyn 10 mlrd. teńgeden artyq kóterýge jol berildi. Mundaı mysaldardy júzdep keltirýge bolady», deıdi depýtat.
Osylaı degennen keıin depýtat salyq tóleýshilerdiń qarajatyn jumsaýda qatań tártip ornatyp, jobalar qunynyń zańsyz jáne qısynsyz ósýine tosqaýyl qoıatyn ýaqyt jetkenin málimdedi.
«Memlekettik aqsha baqylaýda bolýy kerek. Arany ashylǵan toıymsyz merdigerlerdi «tamaqtandyrýdy» toqtataıyq. Osyǵan baılanysty ınfraqurylymdy damytýǵa bólinetin bıýdjet qarajatyn josparlaý úderisin qatań baqylaýǵa alýdy suraımyn», dedi Erlan Saırov.
