Osydan biraz buryn oblystyq mýzeı ujymy «Syr óńirindegi dalalyq ekspedısııa jáne empırıkalyq zertteýler» ǵylymı jobasyn qolǵa alyp, onyń sheńberinde aımaqta ótken ustalar men olardyń muralary keńinen zerttelgen bolatyn. Mýzeı qoryn etnografııalyq eksponattarmen tolyqtyrǵan osy bastama aıasynda zamanynda ustalyq qylyp, naýqastardyń dertine shıpa berer emshilikpen aınalysqan Mámbet áýlıe ustaǵan Quran kitaby halyq ıgiligine aınaldy.
El aýzyndaǵy ańyzda Mámbet Oljabaıulynyń HIH ǵasyrdyń ekinshi jartysynda qazirgi M.Shámenov aýyldyq okrýgine qarasty «Kóktondy» asarynyń mańynda dúnıege kelgeni aıtylady. Kishi júzdegi Tabyn rýynyń Toqberli atalyǵynan taraıtyn Mámbetke áýlıelik pen ustalyq qasıet bala kezinde qonǵan desedi.
Birde qazirgi ustahanasy turǵan jerde top balamen birge mal jaıyp júrgen bala Mámbet kórik basyp, tóstegi temirdi balǵamen uryp jatqan adamdardy kóredi. Qasyndaǵylar baıqamaǵan osy tylsym balaǵa jıi kórine bergen soń ákesi Oljabaı aýyl aqsaqaldaryn alyp álgi jerge keledi. Ol «Mundaıda mal shalyp, qurbandyq berý kerek» degen qarııalardyń aqylymen astyndaǵy atyn shalyp jibergende mańyndaǵylardyń kózine gúrsildegen kórik, jalańdaǵan ot, shaqyldaǵan balǵa kóringen eken. Sodan aýyl aqsaqaldary: «Myna usta dúkeniniń ıesi Mámbet bolady», dep balaǵa batasyn beripti.
Áýlıeniń piri jeti qazan, aqqý, jolbarys, qasqyr, jylan bolǵan desedi. El arasynda búginge deıin qyzýy temirdi balqytatyn otqa qolyn súńgitip, bir sıpaǵanda qazannyń jaryǵyn biteıtin áýlıeligi, adam basyndaǵy jarany sıpap-aq jazatyn emshiligi týraly jıi aıtylady.
Quran kitabyn áýlıege Qaljan ahýnnyń balalary syılaǵan degen derek bar. Mámbettiń urpaǵy Telǵara Orynbaıuly máńgilik mekeni Jalaǵash kentinen Batysqa qaraı jol boıynan buıyrǵan baba zıratynyń shyraqshysy bolyp, ózi dúnıeden ótkenge deıin osy kitapty kóziniń qarashyǵyndaı saqtaǵan eken. Qundy dúnıeni mýzeı qoryna osy Telǵara aqsaqaldyń qyzy aqyn-sazger, ulaǵatty ustaz Aıkúmis Orynbaeva tapsyrypty.
Oblystyq tarıhı-ólketaný mýzeıiniń ǵylymı qyzmetkeri Lázzat Jalǵasbaevanyń aıtýynsha alda qundy dúnıeni túrli taqyryptyq kórmelerge qoıý josparlanyp otyr.
QYZYLORDA
