Foto: Mádenıet jáne aqparat mınıstrligi
Konferensııaǵa Islam yntymaqtastyq uıymyna múshe 50-ge jýyq memleket qatysty. Olardyń arasynda Islam áleminiń mádenı mura komıtetiniń múshesi – Qazaqstan da bar. El atynan bul jıynǵa Mádenıet jáne aqparat vıse-mınıstri Evgenıı Kochetov bardy.
Halyqaralyq kezdesýdiń basty maqsaty – órkenıetter, mádenıetter men dinder arasynda dıalog ornatý, ıslam mádenıeti týraly obektıvti kózqaras qalyptastyrý, sondaı-aq ádilettilik, beıbitshilik, bostandyq jáne adam quqyqtary qundylyqtaryn nasıhattaý.
Delegasııa basshylary konferensııanyń jumys otyrysynda sóz sóılep, osy maqsattarǵa jetýge baǵyttalǵan bastamalar men mehanızmderdi usyndy.
Atalǵan is-sharaǵa ICESCO Islam yntymaqtastyq uıymyna múshe 57 eldiń 54-i kelgen. Mádenıet mınıstrleri konferensııasynyń basty máselesi – Islam áleminiń mádenı astanasyn anyqtaý. 2025 jyly bul mártebeli ataq О́zbekstannyń Samarqan qalasyna berildi. 13-shi konferensııada Islam áleminiń 2026 jylǵy mádenı astanasy jarııalanatyn bolady.
