Ulttyq sporttyń bir túri derlik osynaý saıysty Qaratóbe sport klýbynyń jetekshisi Baýyrjan Shúrmen aýdanda tuńǵysh ret uıymdastyryp otyr. Jarysqa bas-aıaǵy 7 komanda qatysty. Saıys sharty boıynsha ár komanda úsh adamnan quralyp, belgi berilisimen iske kirisedi. Olar úıirli jylqynyń ishinen kórsetilgen asaýǵa quryq tastap, jaıdaq minip, 3 mınýt boıy túspeýge tıis.
«Ádette asaýdy kúrtik qarda nemese kóktemgi toń túsken laısańda úıretedi. Bul joly bári kóz aldymyzda bolsyn dep, keń aýlada ótkizdik. Tebinde júrgen shý asaý qysyraqtyń úıirin arnaıy aıdatyp aldyrdyq», deıdi aýdandyq ishki saıasat bóliminiń basshysy Nurtas Safýllın.
Aqtaısaı aýyldyq okrýgine qarasty Áıish qystaǵynda ótken saıystyń nátıjesinde Saraljyn aýylynan kelgen jigitter komandasy birinshi oryndy jeńip aldy. Janas Baımuqan, Meıirbek Amantaı, Erasyl Qarabek esimdi jigitterden quralǵan top 19 sekýndtyń ishinde asaýdy quryqtap, taqymǵa basyp úlgerdi. Janas Manasuly – kókpar shaýyp júrgen jas shabandoz, saıys týraly habardy estip qalyp, Oraldan arnaıy jetipti. Ol úsh mınýttyń ishinde asaýdyń qytyǵyna tıip, týlatyp-móńkitse de taqymyn jazbady. Jeńimpazdar 50 myń teńgelik sertıfıkatqa ıe boldy.
2-oryn 24 sekýndta asaýdy taqymdaǵan Qaratóbe aýdany ortalyǵy komandasyna buıyrdy. Olardan 3 sekýnd qana keshikken Qaldyǵaıty aýylynyń shabandozdary 3-orynǵa turaqtady. Bul komandalar 40, 30 myń teńgeniń júldesin qanjyǵaǵa baılady.
Aıta keteıik, Qaratóbe sport klýbynyń jetekshisi Baýyrjan Serikuly óńirde at sportynyń damýyna erekshe eńbek sińirip keledi. Qazir aýdanda kókparshylar komandasy qalyptasyp, dodaǵa túser dúleı attardy sonaý Qyrǵyz elinen aldyra bastapty. Keıingi kezde aýdanda túrli taqyrypqa atty joryq, ulttyq saıys jıi uıymdastyrylyp júr.
Batys Qazaqstan oblysy
