Sýretter Pavlodar oblysy tótenshe jaǵdaılar departamentinen alyndy.
«О́tkelderdegi muzdyń qalyńdyǵy 40-tan 70 santımetrge deıin jetedi. Ishki ister mınıstrliginiń 2015 jylǵy 19 qańtardaǵy №34 buıryǵyna sáıkes, muzdyń qalyńdyǵy 25 santımetrden assa, avtokólikterdiń ótýine, 10 santımetrden assa, jaıaý adamnyń júrýine ruqsat beriledi. Biraq buıryqta ótkelderden túsetin jerlerde eki jaqtan da ornatylǵan qalqandarda arnaıy qysqy qural-jabdyqtar (ilgekter, satylar, qutqarý sheńberleri, bóreneler) qoıylýy kerektigi eskertilgen. Buǵan qosa kireberisterde ótkeldiń ataýy, jumys ýaqyty, ony qurý men ustaýǵa jaýaptylardyń derekteri kórsetilgen mańdaıshalar ornatylady. Ári ol jerdegi muzdyń qalyńdyǵy kúnine 2 ret ólshenýge tıis. Mamandarymyz ashylǵan ótkelderdi sholyp shyǵyp, tıisti jaǵdaı jasalmaǵanyna kóz jetkizdi. Atqarýshy organdarǵa eskertý jasap, prokýratýraǵa hat joldadyq. Zań boıynsha, shaǵym túspeıinshe nemese tapsyrma berilmeıinshe, óz betimizben tekseris júrgize almaıyz. Eger quzyrly organ ruqsat etse, tekseristi bastaımyz ári tıisti sharalar qabyldaımyz», deıdi óńirlik tótenshe jaǵdaılar departamenti azamattyq qorǵanys basqarmasy bastyǵynyń mindetin atqarýshy, podpolkovnık Erlan Qasymov.
Aımaqtaǵy muz joldary negizinen mal azyǵy men otyn tasýǵa paıdalanylady. Qazir Maı aýdanynyń Baskól, Aqqýly aýdanynyń Iаmyshev, Tereńkól aýdanynyń Tereńkól, Beregovoı, Peschan aýyldarynda ótkelder jumys istep tur. Aldaǵy ýaqytta Tereńkólde taǵy bireýi ashylady dep josparlanǵan.
E.Qasymov aımaqtaǵy muz ótkelderiniń sany ótken jylmen salystyrǵanda edáýir az ekenin aıtyp ótti. Byltyr 13 muz ótkeli bolǵan.
«Arqa dalasynda bıyl jyldaǵydaı aıaz joq, soǵan saı Ertis ózeniniń ortańǵy tustarynda muz qatpaǵan jaǵdaı jıi kezdesip otyr. Ári ózenge Aqsýdaǵy jylý-elektr stansasynan shyǵatyn jyly aǵys quıady. Ol da muzdyń jetkilikti qatpaýyna áser etedi. О́tkelderde muz normaǵa saı kelmese, talapqa saı jaraqtalmasa, adamdar men avtokólikterdi ótkizýge bolmaıdy. Ondaı muz joldarynda qaýip kez kelgen sátte týyndaýy yqtımal», deıdi maman.
Tótenshe jaǵdaı qyzmetkerleri muz ústine kólikpen shyqqanda baıaý júrý kerektigin, tejegishti birden baspaý kerektigin eskertedi. Muzda toqtaýǵa, burylýǵa, ózge avtokólikti basyp ozýǵa bolmaıdy. Muz ústinen ótpes buryn jolaýshylardy túsirip, qaýipsizdik beldigin sheship tastaý kerek. Júrgizýshi jaqtaǵy esikti ashyq qaldyrǵan durys. Ruqsat etilmegen jerlerde balyq aýlaýǵa, shuńqyrlar jasaýǵa, muz ústine shyǵýǵa bolmaıdy.
Pavlodar oblysy
