Sýrette: mýzeı qoryna tapsyrylǵan kóne jádigerler
Bul is-shara – óńir tarıhyn zertteýge, mádenı murany saqtaýǵa jáne bolashaq urpaqqa jetkizýge baǵyttalǵan mańyzdy qadam. Tabys etilgen jádigerler qatarynan kóne qorymdardan tabylǵan arheologııalyq artefaktiler men erekshe tarıhı muralardy kórýge bolady.
«Uzynbulaq qorymynan tabylǵan (VII–IX ǵǵ.) temirden jasalǵan jebe ushtary, temir úzeńgi men ilmekti beldik, jylqy ábzelderiniń temir fragmentteri, qola plastınaly japsyrmalary bar aǵash qaldyqtary, qola ilmekti beldik, jaýynger beldiginiń qola japsyrmalary, pyshaqtyń ushy, oıýly qysh qumyra fragmenti bar. Sondaı-aq Uıǵyr aýdany Shoshanaı aýyly mańynan 2023 jyldyń maýsym aıynda tabylǵan petroglıf tas ta mýzeı qoryna tabys etildi. Bul jádigerler aımaqtyń baı mádenı-tarıhı murasyn tanystyrýǵa, qazaq dalasynda ómir súrgen ejelgi órkenıet izderin zertteýge múmkindik beredi. Kóptegen artefakti – erte túrki dáýiriniń áskerı, sharýashylyq jáne turmystyq zattary», deıdi Almaty oblystyq tarıhı-mádenı murany qorǵaý jónindegi ortalyqtyń bas ınspektory Erkebulan Baqabaev.
Oblystyq tarıhı-mádenı murany qorǵaý ortalyǵy 2022 jyldan bastap tarıhı-mádenı eskertkishterdi jınaqtaý jumysymen aınalysyp keledi. Oǵan ál-Farabı atyndaǵy Qazaq ulttyq ýnıversıtetiniń ǵalymdary atsalysyp, buzylý jáne tonalý qaýpi tóngen obalarǵa arheologııalyq qazba jumysyn júrgizip jatyr. Mýzeı qoryna tapsyrylǵan jádigerler tabandy eńbektiń nátıjesin kórsetedi.
Almaty oblysy,
Kegen aýdany
