Bochchadan praktıkalyq semınar-trenıngke Astana, Almaty, Shymkent, Taldyqorǵan, Atyraý, Jańaózen, Pavlodar qalalary jáne Jetisý, Abaı oblystary sııaqty ár óńirden kelgen 16 sportshy men jattyqtyrýshy, sondaı-aq 9 óńirlik federasııanyń basshylary qatysyp jatyr.
Is-sharanyń maqsaty – óńirlerde atalǵan sport túrin damytýdyń biryńǵaı strategııasyn ázirleý jáne sportshylardyń áleýetin odan ári ashýǵa yqpal etý. Sonymen qatar praktıkalyq sheberliktiń de mańyzy zor. Trenıngke shaqyrylǵan jattyqtyrýshylar – álemge tanymal jáne bochchadan Paralımpıada chempıondaryn daıyndap júrgen tájirıbeli mamandar. Naqty aıtqanda, ońtústikkoreıalyq sarapshy Chol Hen Kvonnyń ádistemesi boıynsha búkil álem bochchashylary jattyǵady. Al Taılandtan kelgen Kotsıla Samrıt – bochchadan osy eldiń ulttyq quramasynyń bas bapkeri.
M.Áshimbaev bochchashylarmen belsendi jumys istep jatqan sheteldik jattyqtyrýshylarǵa alǵys bildirip, sportshylarǵa sáttilik tiledi. Sondaı-aq ol búginde elimizde bochchamen aınalysqysy keletinder qatary jyl saıyn kóbeıip kele jatqanyn jáne otandyq sportshylardyń daıyndyq sapasy da arta túskenin atap ótti. Sondyqtan álemdik deńgeıdegi jattyqtyrýshylardyń sheberlik sabaqtary jańa tehnıkany meńgerýge, biregeı ádistemelerdi pysyqtaýǵa jáne bochchanyń erekshelikterine tereń úńilýge jol ashady.
